TANGAZO

Sunday, October 19, 2014

SAUTI YA NYIKANI..... MWAITELEKE, KIJANA MSOMI ANAYETAJWA MBIO ZA UBUNGE MBEYA MJINI


NA GORDON KALULUNGA

WIKI hii ni wiki ya Vijana, Rais Jakaya Kikwete, wakati anazima mwenge wa uhuru mkoani Tabora mwanzoni mwa wiki na kumbukumbu ya miaka 15 ya kifo cha Mwalimu Julius Nyerere, alisema vijana ndiyo wanufaika wakubwa na Tanzania ijayo.

Katibu Mkuu wa CCM Taifa, Abdulhaman Kinana, akiwa mjini Dodoma wakati wa semina za makatibu wa CCM nchi nzima katikati ya wiki hii, amewaambia kuwa katika ngazi zao za uteuzi wawe makini kupendekeza majina ya watu wanaokubalika na jamii badala ya fedha.

Ukitaka kuwaudhi baadhi ya viongozi wa CCM, ambao wamezoea kufikiri kidogo badala ya kufikiri sana, waulize swali la kwanini majimbo ya upinzani yanaongezeka.

Wanaishia kusema kuwa ni kutokana na makundi ndani ya chama, badala ya uhalisia kuwa rushwa katika ngazi za uteuzi imetawala, hivyo watu wanaokubalika katika jamii wasio na fedha huachwa.

Leo sauti ya nyikani inatokea mkoni Mbeya na kuangaza upepo wa kisiasa uliopo jimbo la Mbeya mjini.

Kwa sasa Jimbo la Mbeya Mjini lipo chini ya Chama cha demokrasia na Maendeleo(Chadema), na Mbunge wake ni Joseph Mbilinyi.

Mbunge huyu amekuwa akipongezwa na baadhi ya wananchi kuwaletea maendeleo katika kata zao kwa kile wachambuzi wa masuala ya siasa mkoani hapa wakisema anatumia vema hasa usimamizi mzuri wa matumizi ya fedha za mfuko wa Jimbo.

CCM, inahaha kulirejesha jimbo hilo katika himaya yake, lakini kitendawili kinabaki miongozi mwao kuwa ni nani mwenye kuwaunganisha wote, ukizingatia kuwa asilimia sabini ya wajumbe wa kamati ya siasa ambayo ni kikao cha maamuzi kwa watakaohitaji kugombea nafasi hiyo nao wanatajwa kuwemo kwenye mstari wa safari hiyo ya matumaini.

Baadhi ya watu wanaotajwa kuwemo katika kinyanganyilo hicho cha ubunge nje ya kamati ya siasa ya CCM wilaya ya Mbeya mjini ni pamoja na Mkurugenzi wa Shirika la nyumba Tanzania(NHC), Nehemiah Mchechu, Mwenyekiti wa saccos kubwa Jijini Mbeya, (UWAMU SACCOS), Rodrick Y. Nyaluke na mjasiliamali kijana, Nwaka Mwakisu.

Wengine ni Mkuu wa wilaya ya Newala, Christopher Magala na Mtaalamu wa Masuala ya Ufuatiliaji na Tathimini, Ofisi ya Waziri Mkuu – Tawala za Mikoa na Serikali za Mitaa (OWM – TAMISEMI), Eliurd Leonard Mwaiteleke.

Leo nikianza na kijana Eliurd Mwaiteleke, anatajwa katika mbio hizo za kuweza kupeperusha bendera za CCM katika jimbo hilo la Mbeya Mjini kwa nia ya kukomboa jimbo, huku baadhi ya vijana wakimpa ‘‘dole’’, ukizingatia kuwa ni kamanda wa UVCCM kata ya Sinde Jijini Mbeya na alipendekezwa kuwa kamanda wa UVCCM mkoa wa Mbeya, akuweza kufanikiwa kutokana na umri wake.

Kabla sijaandika makala haya, nilijaribu kumtafuta na kutaka kujua wasifu wake, mbali na kukataa kuwa ni mmoja wa waliotangaza nia katika jimbo hilo, alisema kuwa yeye ni mtoto wa masikini lakini jitihada zake zimemfikisha hapo alipo.

Mwaiteleke alizaliwa May 28, 1977,  eneo la Mwanjelwa jijini Mbeya, mwaka 1986 alipelekwa kujiunga na shule ya Msingi Salemu, wilayani Rungwe mkoani Mbeya na kuhitimu mwaka 1992, kisha akajiunga na shule ya sekondari Ivumwe Jijini Mbeya kati ya mwaka 1993-1996 na mwaka 1997 na 1999 akajiunga na kidato cha tano na sita shule ya Sekondari Malangali

 Kijana huyu, anasema kwa sasa ana elimu ya Shahada ya Uzamili katika Sayansi ya Maendeleo ya Sera (Master Degree of Science in Development Policy (MSc.DP), aliyotunukiwa katika Chuo Kikuu Mzumbe, baada ya kusoma tangu mwaka 2009 – 2011, akitokea Chuo Cha Mipango ya Maendeleo Vijijini (Institute of Rural Development Planning - Dodoma (IRDP) baada ya kuwa na cheti na stashahada ya juu katika masuala ya mipango na mazingira.

Kijana huyu pia ni mtaalam wa masuala ya Ukusanyaji Takwimu Muhimu za usafi wa Mazingira, mtambuzi wa walengwa wa njaa  na ugawaji wa chakula na mwibuaji na msimamizi wa miradi ya kijamii kwa jamii iliyoathirika na UKIMWI.

Mwaiteleke anaonesha hulka na akipendacho kuhusu mipango na masuala mengine muhimu ya  mwelekeo wake kuwa ni kuungana na vijana wenzake kusaidiana mambo ya maendeleo kwa kutumia ujuzi na elimu aliyonayo hasa kuelezana kuhusu fursa zilizopo, changamoto na namna ya kuzifikia pamoja na kuzitatua ili wapate maendeleo yanayotarajiwa.

Kuhusu heshima ya Mbeya anasema, ni vema vijana wa mkoa wa Mbeya, wakatambua namna wazee wao jinsi walivyojenga heshima ya Mkoa wa Mbeya na namna wao wanavyoweza kusaidia kurudisha heshima na hadhi ya Mbeya inayopotea siku hadi siku.

Anaamini katika juhudi kwa kila jambo ili kuweza kuleta tofauti katika maisha ya jamii nzima ya wana Mbeya, ikiwa ni pamoja na kuanzisha mijadala ya wazi kwa vijana katika Nyanja mbalimbali.

Nyanja ambazo anazipa kipaumbele katika mijadala ni pamoja na masuala ya maendeleo ya elimu (tathimini ya elimu katika mkoa), afya, Mazingira na usafi wa Jiji la Mbeya, ukuzaji kipato cha jiji na kuwafikia wananchi, Miradi ya maendeleo, fursa za mikopo kwa vijana na wanawake na namna ya kuzikifikia.

“Tulikuwa na viwanda Jijini Mbeya, leo hii vimepungua, ni suala ambalo pia linahitaji mijadala kwa ajili ya kujua namna vinavyoweza kutengeneza ajira kwa vijana, kuanisha mapungufu yanayokwamisha maendeleo ya Mkoa na Kuanisha mapungufu na changamoto zinazowakabili vijana” anasema Mwaiteleke.

Anasema angependa vijana wawe na mwanga wa kutambua masuala ya jiji , uwajibikaji wake pamoja na ubunifu wa kiutendaji, kujua kufanya mapitio ya mipango inayopangwa kila mwaka kama inaleta tija kwa kundi kubwa la vijana ama la.

Kwa upande wa mtazamo wake kuhusu wazee anasema ni muhimu kutambua mahitaji halisi ya wazee na vipaumbele vyao na jinsi ya kuwatekelezea mahitaji yao bila kusahau masuala ya akina mama na vipaumbele vyao.

Hasiti kueleza kuhusu masuala mtambuka ya VVU, kilimo na fursa ya kilimo cha maua kwa vijana hasa ukizingatia fursa ya uwanja wa ndege wa kimataifa wa Songwe na fursa za wasomi waliopo na wajasiliamali.

Huyu ndiye kijana Eliurd Mwaiteleke, ambaye anatajwa kuwa na nia ya kuipeperusha bendera ya CCM katika Jimbo la Mbeya Mjini kwa lengo la kulikomboa Jimbo kutoka mikononi mwa Chadema.

Wiki ijayo tutamwangalia kijana mjasiliamali na mpenda michezo kwa vijana wenzake Nwaka Mwakisu.

WALIMU MBEYA WAMUUNGA MKONO LOWASSA

NA GORDON KALULUNGA, MBEYA

WALIMU wa wilaya ya Mbeya, Jimbo la Mbeya Vijijini, wameunga mkono sera isiyo rasmi ambayo imewahi kutolewa hivi karibuni na aliyekuwa Waziri Mkuu, Edward Lowassa, kuwa kipaumbele cha Serikali kiwe Elimu kwanza badala ya kilimo kwanza.

Hayo yameelezwa jana na Mwenyekiti wa Chama cha walimu wilaya ya Mbeya, Anthony Mwaselela, alipokuwa akisoma risala ya walimu katika maadhimisho ya siku ya walimu duniani-Wilaya ya Mbeya yaliyofanyika katika tarafa ya Isangati, kata ya Ilembo, mbele ya mgeni rasmi Prof. Norman Sigalla.

Mwaselela alisema kuwa, kutokana na serikali kutoweza kuwekeza kikamilifu katika elimu, walimu kwa sasa wanachopata na kukifurahia kwa taaluma yao ni neno Shikamoo.

“Nchi zilizowekeza kwenye elimu kwanza, ndizo zinazotisha kimaendeleo duniani mfamo China, hata sisi tunaweza kutoa tamko maana hatujachelewa, twaweza kimbia, elimu kwanza badala ya kilimo kwanza” alisema Mwalimu Mwaselela.

Alisema katika wilaya ya Mbeya inakabiliwa na changamoto nyingi zinazotokana na kutowekeza katika elimu, ikiwemo suala la nyumba za walimu, madawati, ofisi za walimu, vyoo, madai ya fedha za likizo, kuchelewa kupanda madaraja hasa kwa walimu wanaojiendeleza na malimbikizo

Kuhusu nyumba za walimu alisema mahitaji ni nyumba 1906, zilizopo ni nyumba 477 nazo zina hali mbaya, mahitaji ya vyoo vya walimu ni matundu 373, yaliyopo ni matundu 267 yenye hali mbaya na madawati mahitaji ni 21931, yaliyopo ni 17328 lakini nayo yana viraka.

“Hali hii inatokana na kutowekeza katika elimu. Kutojipanga vizuri kwa serikali upande wa elimu kiuwekezaji, kumesababisha walimu wengi kuwa na kero nyingi zinazowavunja moyo kiutendaji na hata kuwafanya vijana wengi kutopenda kazi ya ualimu pamoja na kuwa na heshima nyingi za Shikamoo”alisema Mwaselela.

Akijibu risala ya walimu hao, Mkuu wa wilaya ya Mbeya, Prof. Norman Sigalla, alisema kitaalamu mwalimu bora zaidi ni yule wa shule ya Msingi akifuatiwa na mwalimu wa Sekondari.

Alisema changamoto za walimu walizosema mbele yake ni halali lakini tatizo ni uwoga wa walimu kueleza kero zao kwa viongozi wanaohusika, ambapo kwa wilaya hiyo, asilimia 90 ya walimu hawajawahi kufikisha malalamiko yao kwa Mkurugenzi Mtendaji wa wilaya ambaye ni mwajiri wao na kiongozi wa serikali ambaye ni yeye Mkuu wa wilaya.

Akielezea tatizo la walimu kutopandishwa madaraja kwa wakati alisema kuwa, tatizo siyo la kimfumo kama walimu wanavyotafsiri, bali ni kutotimiza wajibu wa baadhi ya watumishi wanaohusika katika suala hilo na bahati mbaya walimu wananungunika badala ya kufikisha malalamiko yao kwa viongozi wa serikali hasa ofisi za wakuu wa wilaya.

“Nisisitize kwenu walimu wenzangu kuwa, serikali yenu ya CCM, ina lengo zuri, bali wakosaji wengi wa utumishi wa umma wanapokosea wanasingizia wegine. Wakiwazungusha na kuwajibu kwa dharau, njoo ofisini kwangu, maana Mkuu wa wilaya ndiye mwenye serikali”alisema mkuu huyo wa wilaya.

Alisema katika ofisi yake anapokea walevi, wavuta bangi na watu kadha wa kadha kwa ajili ya kusikiliza hoja wala siyo ulevi au uchafu wa mwonekano wa mtu, na akahoji sembuse Mwalimu?

baada ya hotuba yake, aliendesha harambee ya kuchangia madawati ya shule za msingi za tarafa hiyo ambapo zilipatikana Milioni Shilingi sita.

Friday, October 17, 2014

MWANRI: ZINGATIENI WELEDI WAKATI WA KUANDAA MAANDIKO YA MIRADI

Kaimu Katibu Mtendaji wa Ofisi ya Rais, Tume ya Mipango, Bibi Florence Mwanri (aliyesimama) akizungumza na baadhi ya viongozi waandamizi wizara za viwanda na biashara, fedha, uchukuzi, nishati na madini pamoja na viongozi waandamizi kutoka Ofisi ya Rais, Tume ya Mipango, Zanzibar. 

Na Saidi Mkabakuli

Wapanga mipango nchini wameaswa kuzingatia weledi wakati wa kuandaa maandiko ya miradi yanayowasilishwa kwa wafadhili ili kuongeza ushindani dhidi ya nchi nyingine wakati wa uwasilishaji wa maombi ya kupatiwa ufadhili wa miradi ya maendeleo.

Wito huo umetolewa na Kaimu Katibu Mtendaji wa Ofisi ya Rais, Tume ya Mipango, Bibi Florence Mwanri wakati alipofanya mazungumzo na viongozi waandamizi kutoka wizara za viwanda na biashara, fedha, uchukuzi, nishati na madini pamoja na viongozi waandamizi kutoka Ofisi ya Rais, Tume ya Mipango, Zanzibar.

Bibi Mwanri alisema kuwa kuna ushindani mkubwa kwa nchi zinazoomba ufadhili wa miradi ya maendeleo hivyo uandishi wa maandiko yenye kuzingatia weledi na viwango vya kimataifa ni msingi katika kuongeza ushindani na kuweza kuwashawishi wafadhili kuvutiwa na miradi husika.

“Katika kukabiliana na ushindani hatuna budi kujikita katika weledi na kuandika maandiko yenye kuweza kuvutia wafadhili ili waweze kuja kuwekeza nchini kwetu, ili tuweze kutimiza ndoto zetu za kuifanya Tanzania kuwa nchi yenye uchumi wa kati kufikia mwaka 2025” alisema Bibi Mwanri.

Mwezi Juni mwaka 2011, Serikali iliandaa Mpango wa Kwanza wa Maeneleo (2011/12 – 2015/16) kwa lengo la kutekeleza Dira ya Taifa ya Maendeleo 2025 ambapo Mpango huu ulihitaji takribani trilioni 40 ili kutekeleza miradi mbali mbali ya maendeleo kwa kipindi cha miaka mitano. 

Kwa mujibu wa Mpango huo, vyanzo vya utekelezaji wake ni  pamoja na Ubia Kati ya Sekta ya Umma na Sekta Binafsi (PPP);  uwekezaji wa kigeni; Hati Fungani kwa Waishio Ughaibuni; Hatifungani za ndani; Hati Fungani katika Masoko ya Nje; Mifuko ya Pensheni na hifadhi ya jamii; na makubaliano ya ushirikiano wa kiuchumi wa nchi zinazoendelea.

GOOD MORNING WALIMU MBEYA VIJIJINI





Mkuu wa wilaya ya Mbeya, Prof.Norman Sigalla (wa tatu kutoka kushoto), akiwa na viongozi wa chama cha walimu wilaya ya Mbeya na mkoa wa Mbeya jana, katika kata ya Ilembo, wilaya ya Mbeya, Jimbo la Mbeya Vijijini.

89 MBEYA MJINI, WAIKIMBIA CHADEMA NA KUJIUNGA NA CCM

 Mbunge wa viti maalum mkoani Mbeya, Dr. Mary Mwanjelwa, akizungumza na baadhi ya vijana waliotoka Chadema na kujiunga na CCM jimbo la Mbeya mjini jana.
 Mbunge wa viti maalum mkoani Mbeya, Dr. Mary Mwanjelwa, akizungumza na baadhi ya vijana waliotoka Chadema na kujiunga na UVCCM jimbo la Mbeya mjini jana kisha akawakabidhi jezi.

VIJANA 89 waliokuwa wanachama wa Chama cha Demokrasia na Maendeleo (Chadema) Jimbo la Mbeya mjini linaloongozwa na Mbunge Joseph Mbilinyi(Sugu), wamekihama chama hicho na kujiunga na Chama Cha Mapinduzi(CCM).

Wanachama hao wapya wa CCM, walijiunga na chama hicho jana katika kata za Ilomba na Ruanda wakitokea katika maeneo ya Ilomba, Mama John, Makunguru, Mwanjelwa na Kabwe.

Akiwapokea na kuwakabidhiwa kadi zao mpya za CCM na UVCCM, Mbunge wa Viti maalum mkoani Mbeya, Dr. Mary Mwanjelwa, aliwapongeza kwa uamuzi wao wa kurejea na wengine kujiunga na kuchukua kadi za chama hicho.

“Nawapongezeni wote maana hamjakosea kurejea kwenye chama salama ambacho kinajali vijana kwa kuwawezesha kuwa wajasiliamali”alisema Dr. Mwanjelwa.

Awali akisoma risala ya chama tawi la Ilomba, Katibu wa tawi hilo Lucian Kapinga, alisema kuwa wakati wa vurugu zilizotokea Jijini Mbeya na kupachikwa jina la “Maandamano ya machinga”, baadhi ya wajumbe walinusurika kufa baada ya ofisi hiyo kuvamiwa na vijana na kuichoma moto wakati wajumbe wakiwa kwenye kikao.

Alisema kutokana na uhalibifu huo, jengo lao liliungua na kulazimika kulifumua na kulifanyia ukarabati ambapo kwa sasa umebaki ukarabati mdogo unaogharimu kiasi cha Tsh.6000,000/=.

Dr. Mwanjelwa aliwapa pole na kuchangia kiasi cha Tsh.200,000/= huku akiwaasa vijana kuepukana na mkumbo wa siasa za vurugu, huku akiwapatia jozi moja ya jezi na mipira minne kwa ajili ya vijana wa kike na kiume.

Nape nnauye akumbushwa ahadi.

Katika mfululizo wa ziara za Mbunge Dr. Mary Mwanjelwa Jimbo la Mbeya Mjini za kupokea wanachama wapya kutoka Chadema, alisomewa risala ya kumkumbusha Katibu wa itikadi na uenezi wa CCM Taifa, Nape Nnauye aliyowaahidi vijana wa mtaa wa Blue house Kabwe Mwanjelwa, kuhusu ujasiliamali.

Akisoma risala hiyo kwa niaba ya wenzake 50,ndani ya ukumbi wa Mfikemo Hotel, Mariam Hamisi, alisema kuwa Nape alitembelea eneo hilo na kuwaahidi vijana hao kuwapatia mtaji endapo watafungua akaunti benki, ambapo kwa sasa tayari wamefungua akaunti na kuunda kikundi chao kinachojuliakana kwa jina la Halimpya kasi mpya.

“Sisi tumebadilika na kurejea CCM, wapo wengi nyuma yetu, tunakiomba chama kimsimamishe mtu anayekubalika ili kukomboa jimbo la Mbeya mjini na sisi tuna imani na wewe, tunaomba pia ututangaze hata kwa marafiki zako ili tuwe mfano kwa wenzetu kuhusu uchumi” alisema Mariam.

Baada ya risala hiyo, kundi lingine la vijana walijitokeza na kutamka kuwa nao wanahitaji kujiunga na CCM na kuwa na kikundi kilichosajiliwa ili wawe wajasiliamali na kwamba wametumikishwa vya kutosha na Chadema bila kupewa maarifa ya kujikwamua kiuchumi.

Akijibu risala na maoni ya waliojitokeza katika eneo hilo, Dr, Mwanjelwa aliwahakikishia kuwa risala hiyo ataifikisha kwa Nape Nnauye na yeye akawakabidhi Tsh. 200,000/= na kumwagiza Katibu wa UVCCM wilaya ya Mbeya Mjini, Julius Msaka kuwa akutane na vijana wanaohitaji kurejea na kujiunga na CCM na kutaka kuwa wajasiliamali ili wapange jinsi ya kuanzisha kikundi na utaratibu wa kupewa kadi za chama hicho.

Mbali na mambo mengine, aliwasihi wanachama hao wapya na wengine kujitokeza kujiandikisha katika uboreshaji wa daftari la kudumu, zoezi ambalo alisema litaanza mwezi ujao.

Sanjali na hayo alitetea suala la rasimu ya tatu ya katiba kuwa imejaa maslahi ya wananchi likiwemo suala la hamsini kwa hamsini kwa wanawake ambalo aliwasihi wanawake kutolitumia vibaya ikiwemo kuvuruga maadili na utu wa mwanamke matokeo yake litavunja ndoa.

Wednesday, October 15, 2014

SAUTI KUTOKA NYIKANI......CHADEMA MBEYA NA SURA ZILIZOJAA MACHOZI

 Kulia ni Mwenyekiti wa (CHADEMA) MBEYA MJINI, John Mwambigija, akizungumza na waandishi wa habari

NA GORON KALULUNGA

NIWASHUKURU wasomaji wangu mliotumia gharama kubwa za muda na fedha kwa kunipigia simu na kuandika jumbe fupi za maandishi kuhusu makala zilizopita ikiwemo ile ya athari ya saikolojia kwa taifa.

Ikumbukwe kuwa, meno ya mbele au sebuleni, hayana nguvu ya kutafuna chakula, bali mara kadhaa yamekuwa shujaa kwa ajili ya mwonekano wa mtu na kung’ata ulimi.

Uongozi ni sanaa, inayofanyika kwa watu, ili wafanye kwa manufaa yako, kwasababu unayoitaka au wanayoitaka wao, lakini mdomo kimya unatunza busara kulio mdomo unaobwatuka.

Dhima ya vyama vingi ni kushika dola, lakini hapa kwetu Tanzania,  dhima imegeuka kuwa ni kuundiana tuhuma na kusingiziana.

Kutokana na hali hiyo, jamii imebadilika, badala ya kuwa jamii moja na tulivu, sasa imekuwa jamii ya vita.

Wahanga wa siasa mara nyingi wanakuwa na hila na machoi katika mioyo na nyuso zao, huku wakiwaaminisha wananchi kuwa wao ni watu safi na wanaaa kwa mabadiliko ya fikra na maendeleo ya jamii.

Baadhi ya watanzania wanahitaji mabadiliko, wanayataka mabadiliko ndani ya Chama Cha Mapinduzi(CCM) na wasipoyapata huko wapo tayari kuyapata nje ya CCM.

Lakini wanakatishwa tamaa kuyaendea huko nje ya CCM kutokana na baadhi ya mambo yanayotendeka na kutokea, kama ifanyavyo CCM, ama zaidi ya CCM.

Tangu tunadai uhuru wa Tanganyika na hata mapinduzi matukufu ya Zanzibar, tulikataa mfumo wa ukoloni na ubeberu na kuhakikisha tunakomboa hata nchi zingine na kulaani mifumo hiyo.

Leo hii, kuna vyama nje ya CCM, vinakuja na mfumo ule ule ambao watanzania tuliukataa na kuupinga.

Kila anayewapinga kwa hoja hasa ndani ya vyama vyao huishia kutishwa kuwa watamfukuza au ajivue  gamba, badala ya kushindana nae kwa hoja.

Katiba ya nchi hii, imetoa uhuru wa kutoa maoni kwa kila mtanzania, lakini ndani ya baadhi ya vyama vya siasa, baadhi ya viongozi hawataki wengine watoe maoni.

Mbunge wa Maswa Magharibi, John Shibuda, amewahi kunukuliwa akisema kuwa, bila kuwa na majadiliano hai ya chemsha bongo, mpaka hivi leo wanasayansi wasingeweza kuzalisha dawa nyingi za kutuliza maumivu, maana wangepigwa marufuku wengine kufikiri na kutengeneza dawa hizo kama ambavyo tume ya Warioba inavyotaka.

“Mfumo wa ukawa ni mfumo wa kudumaza fikra za watanzania na siyo uhisho wa fikra za taifa ambalo wananchi wake wanatakiwa kufikiri na kutoa maoni yao” anasema Shibuda.

Uongozi imara wa mtu yeyote ni ushawishi na wala siyo ubabe wa kutishia na kuhimiza kauli za ubeberu na kuzira.

Ndani ya Chama cha demokrasia na Maendeleo (Chadema) mkoa wa Mbeya, wimbi hilo la kuikana demokrasia huku kikitangaza kuwa ni cha demokrasia, limeshika kasi.

Wanaotajwa kutaka kuwania nafasi za ubunge katika majimbo ya mkoani Mbeya, kupitia chama hicho, wananangwa kuwa wameamua kupeana nafasi za uongozi na kuwang’oa viongozi wasiowaunga mkono.

Baadhi ya viongozi hao ambao wote ni viongozi wa kanda ya nyanda za juu kusini, wanadaiwa, kutumia jina la Katibu Mkuu, Dr. Wilbroad Slaa, kuwa yeye ndiye hawataki viongozi waliokuwepo, hivyo, kuamua kuunda safu yake mpya kupitia wao.

Wanaotajwa kuratibu na kufanikiwa kung’oa wenzao kwa mtazamo wa kugombea ubunge 2015, ni pamoja na Mratibu wa Chadema Kanda ya Nyanda za juu kusini, Frank Mwaisumbe, mratibu wa hamasa kanda, ambaye pia ni Mwenyekiti wa Chadema Mbeya mjini, John Mwambigija.

Wengine ni mkuu wa kitengo cha utafiti na sera kanda ya Nyanda za juu kusini, Fanuel Mkisi,  mkuu wa kitengo cha sheria na haki za binadamu, Fadhil Shombe,  mkufunzi mkuu kanda, Pascal Ahonga na Jamson Mwiligumo ambaye ni mkuu wa Chadema ni msingi.

Baadhi ya viongozi hao, wanatajwa kuwa ni wagombea tarajari wa nafasi za ubunge katika majimbo ya Mkoa wa Mbeya, akiwemo Frank Mwaisumbe, anayetarajia kugombea jimbo la Mbeya vijijini.

Jamson Mwiligumo, anatajwa kuwa mgombea tarajari jimbo la Lupa Chunya, John Mwambigija na Lucas Mwampiki ambaye ni mkuu wa ulinzi na usalama kanda, wanatarajia kugombea Ubunge jimbo la Rungwe Magharibi.

Licha ya nafasi ya katibu wa mkoa kuwa wazi kwa sasa mpaka hapo litakapoletwa jina moja kutoka ofisi ya Katibu Mkuu Taifa, mpaka sasa kikosi hicho kinahusishwa na kumtangaza kuwa Katibu wa Chadema mkoa ni Fanuel Mkisi.

Majina ambayo yamepelekwa ofisi ya Katibu mkuu yakingoja uteuzi ni ya Boid Mwabulanga anayetetea nafasi yake, Jidawaya Kazamoyo na Fanuel Mkisi.

Ofisi ya katibu mkuu taifa tayari imepelekewa barua inayoonesha kusigana kwa viongozi hao mkoani Mbeya.

Tayari baadhi yao, wamemwandikia barua Katibu Mkuu wa Taifa, Dr. Wilbroad Slaa, kuhusu mwenendo wa kundi hilo, barua yenye kumbukumbu namba CDM/G/10/113.

Barua hiyo iliandikwa Agosti 9, mwaka huu, ikieleza jinsi kamati ya rufaa ya kanda ilivyo na mipango ovu dhidi ya chama hicho mkoani Mbeya.

Hata hivyo, baadhi ya viongozi wa chama hicho, wanasema walisikitishwa na kauli ya Mwenyekiti wa Chadema Mbeya mjini, John Mwambigija, aliyoitoa kwenye mazungumzo na baadhi ya viongozi wa Mbeya Vijijini katika bustani ya Wagadugu Mbalizi, Agosti 29 mwaka huu, kuwa fitina zake zimefanikiwa baada ya kumng’oa aliyekuwa Mwenyekiti wa Chadema Mbeya Vijijini, Elia Kabolile na aliyewahi kuwa katibu wa Chadema mkoa wa Mbeya, Eddo Mwamalala.

Kwa mipango hii, je watanzania wanaohitaji mabadiliko kuyapata nje ya CCM, malengo yao yatatimia? Au itabaki mpango ule ule wa “tukose” wote?

Karibuni nyikani.

TANZANIA YAJIPANGA KUWA NCHI YA VIWANDA

Picha ya pamoja: Ugeni kutoka Tume ya Mipango na Maendeleo ya China wakiwa katika picha ya pamoja na baadhi ya viongozi waandamizi kutoka Ofisi ya Rais, Tume ya Mipango na maafisa waandamizi kutoka wizara za viwanda na biashara, uchukuzi, nishati na madini pamoja na viongozi waandamizi kutoka Ofisi ya Rais, Tume ya Mipango, Zanzibar.

Na Saidi Mkabakuli

Serikali imesema imedhamiria kuifanya Tanzania kuwa nchi ya viwanda ifikapo mwaka wa fedha 206/2017 ili kuongeza kasi ya kufikia lengo la Dira ya Taifa ya Maendeleo 2025 ambayo imedhamiria kuifikisha Tanzania kuwa nchi yenye hadhi ya kipato cha kati na kuondokana na umaskini kufikia mwaka 2025.

Akizungumza wakati wa kuwakaribisha Ugeni kutoka Tume ya Mipango na Maendeleo ya China, Naibu Katibu Mtendaji anayeshughulikia Biashara za Kimataifa na Mahusiano ya Kiuchumi, Bw. Paul Sangawe, amesema kuwa Tanzania imedhamiria kuaandaa Mpango wa miaka mitano utakaojikita katika uchumi wa viwanda ndani ya muda mfupi ujao.

“Tumedhamiria kuwekeza nguvu zetu kwenye uwekezaji katika viwanda; katika Mpango wa Pili wa Maendeleo, nguvu kubwa tunaiweka katika maendeleo ya viwanda ili kuweza kufikia malengo ya Dira ya Taifa ya Maendeleo 2025,” alisema Bw. Sangawe.

Akizungumza wakati wa kikao cha pamoja na viongozi wa Tume ya Mipango ya Tanzania, Kiongozi wa Msafara huo, Bw. Wang Jianjun ambaye ni Naibu Mkurugenzi Mkuu anayeshughulikia Uwekezaji, alisema kuwa Tanzania ni miongoni mwa nchi chache barani Afrika zenye fursa kubwa ya kufikia maendeleo na kuweza kuondoka kwenye kundi la nchi maskini ndani ya kipindi kifupi kijacho.

Bw. Jianjun aliongeza “ili kuweza kufikia maendeleo ya haraka zaidi, ni vyema Tanzania ikaanza kuwekeza katika viwanda hasa kwenye Maeneo Maalum ya Kiuchumi (SEZs) ili kuongeza tija katika uzalishaji na kuongeza thamani bidhaa zake ili kuvutia masoko toka nje ya nchi.” 

MWANAMKE AUAWA KWA KUSHINDWA KULIPA T.SH,3,000/=


Kamanda wa polisi mkoani Mbeya,Ahmed Msangi.
 
WAKATI wajumbe maalum wa katiba wakiwa wamependekeza suala la haki za binadamu na mgawanyo sawa wa madaraka kati ya mwanamke na mwanaume, vitendo vya ukatili na mauaji kwa wanawake vimezidi kushika kasi mkoani Mbeya.

Katika tukio la hivi karibuni, mwanamke mmoja aliyejulikana kwa kwa jina la Rutina Ng’ekele(75), mkazi wa kijiji cha Mabondeni, kata ya Bulyaga, tarafa ya Tukuyu mjini wilayani Rungwe, amefariki dunia katika hospitali ya Makandana wilayani Rungwe, akiwa anapatiwa matibabu baada ya kushambuliwa kwa mateke na ngumi.

Taarifa zinasema kuwa, Bibi huyo alishambuliwa vikali sehemu mbalimbali za mwili wake na mtu aliyefahamika kwa jina la Nicolous Afyasisye.

Tukio hilo limeelezwa kutokea Octoba 4, mwaka huu, majira ya saa moja usiku na kupelekea marehemu kulazwa hospitalini hapo mpka mauti yalipomfika jana Octoba 14, mwaka huu, saa sita mchana.

Chanzo cha tukio hilo, kimeelezwa kuwa ni marehemu kumlipa mtuhumiwa Tsh.7,000/= badala ya Tsh.10,000/= aliyokuwa akidaiwa na mtuhumiwa, jambo ambalo lilisababisha mtuhumiwa aanze kumshambulia marehemu.

Baada ya kitendo hicho, mtuhumiwa alikimbilia kusikojulikana na Jeshi la polisi limethibitisha kuwepo kwa tukio hilo.

Kamanda wa polisimkoani Mbeya, Ahmed Msangi, alisema kuwa anatoa wito kwa yeyote mwenye taarifa za mahala alipo mtuhumiwa wa tukio hilo, azitoe katika mamlaka husika ili akamatwe na hatua za kisheria zichukuliwe dhidi yake.
 

Tuesday, October 14, 2014

MUWSA KWAFUKA MOSHI, MAGHEMBE AAGIZA UCHUNGUZI


 
 
Na Charles Ndagulla,Moshi .

HALI  si swari ndani ya Mamlaka ya maji safi na uondoshaji maji taja(MUWSA) baada ya wafanyakazi kuibua madudu mengi yanayofanywa na uongozi wa mamlaka hiyo.

Miongoni mwa madudu hayo ni ubaguzi katika suala la malipo ya wafanyakazi ambako taarifa zinadai kuwa, kipaumbele kimekuwa kikitolewa kwa wafanyakazi waliotoka DAWASCO ambako mkurugenzi wa sasa wa mamlaka hiyo,Cyprian Luhemeja alitoka huko.

Katika andiko lao,wafanyakazi hao wanadai kuwa,hata taarifa za upotevu wa maji ambazo zimekuwa zikitolewa mara kwa mara na mamlaka hiyo si sahihi huku mishahara ikidaiwa kutolewa bila kuzingatia viwango vya elimu.

Aidha wafanyakazi hao wamedai katika andiko lao kuwa,wapo wateja wapya wapatoa 200 hawajaunganishiwa huduma ya maji kutokana na wazabuni kutolipwa malipo yao kwa wakati.

Wafanyakazi hao wameonya kuwa,kutokana na kuyumba kwa mamlaka hiyo,ipo hatari kwa mamlaka hiyo kushuka hadhi yake na kurudi daraja B kutoka daraja A kutokana na mishahara ya watumishi kusuasua.

Madai mengine ya wafanyakazi hao ni matumizi mabaya ya fedha za mamlaka ambako,yamekuwa yakifanyika manunuzi ambayo hayafuati taratibu na sheria ya manunuzi wakitolea mfano wa manunuzi ya mapazia yaliyofanywa na mtu mmoja(jina tunalo)wakidaI tararibu zilikiukwa.

Kutokana na tuhuma hizo,waziri  wa Maji,Profesa Jumanne Maghembe,ameiagiza bodi ya wakurugenzi wa Mamlaka ya maji safi na uondoshaji majitaka moshi  mjini(MUWSA) kuchunguza malalamiko ya wafanyakazi hao.

Maghembe ametoa maagizo hayo hivi karibuni alipozungumza na waandishi wa habari baada ya kuwepo kwa taarifa za kuwapo na mgongano wa kimaslahi na ubaguzi wa kada ya wafanyakazi wa mamlaka hiyo.

Kwa upande wake mwenyekiti wa Bodi ya wakurugenzi wa MUWSA,Shally Raymond,alikiri kuwapo kwa malalamiko hayo ya wafanyakazi na kwamba tayari uchunguzi umeanza kufanyika.

Mwenyekiti huyo ambaye amewahi kuwa mbunge wa viti maalum(CCM) na meneja wa CRDB tawi la moshi,alijibu kwa ufupi kupitia ujumbe mfupi wa maandishi kupitia simu yake ya kiganjani alipoulizwa.

“marahaba,asante,kama ulivyoelezwa,jambo hili linafanyiwa kazi,asante sana kwa ushirikiano,usiku mwema”ulisomeka ujumbe mfupi wa maandishi uliotumwa na mwenyekiti huyo kwa mwandishi wa bahari hizi.

TAARIFA YA JESHI LA POLISI MKOA WA MBEYA




TUKIO LA KWANZA:

MTU MMOJA ALIYEFAHAMIKA KWA JINA LA CHARLES MAULA (55) MKAZI WA NKUNG’UNGU WILAYA YA CHUNYA ALIKUTWA AMEUAWA KWA KUKATWA SHOKA KICHWANI NA KISHA MWILI WAKE KUTUPWA PORINI NA MTU/WATU WASIOFAHAMIKA.

MWILI WA MAREHEMU ULIKUTWA PORINI MNAMO TAREHE 11.10.2014 MAJIRA YA SAA 18:00 JIONI HUKO KATIKA KITONGOJI CHA LWIKA, KIJIJI CHA NKUNG’UNGU, KATA YA LUPA, TARAFA YA KIPEMBAWE, WILAYA YA CHUNYA, MKOA WA MBEYA. MWILI WA MAREHEMU ULIKUTWA NA MAJERAHA SEHEMU ZA KICHWANI YA KUKATWA KWA SHOKA.

CHANZO CHA MAUAJI HAYO INADAIWA KUWA MAREHEMU ALIKUWA ANADAIWA TSHS. 300,000/=. WATUHUMIWA WATATU WAMEKAMATWA KUHUSIANA NA TUKIO HILO AMBAO NI 1. MASANILO MBOJE (59) 2. MASHALA MASANILO (30) NA 3. MACHIA MAGALAGO (31) WOTE WAKAZI WA LWIKA.

KATIKA TUKIO LA PILI:

BWENI MOJA KATIKA SHULE YA SEKONDARI MBALIZI LIITWALO “NKURUMAH WINGI C” LIMEUNGUA MOTO NA KUSABABISHA HASARA NA UHARIBIFU WA MALI ZOTE ZILIZOKUWEMO NDANI YA BWENI HILO.

TUKIO HILO LIMETOKEA MNAMO TAREHE 12.10.2014 MAJIRA YA SAA 20:45 USIKU HUKO MBALIZI, KATA YA UTENGULE, TARAFA YA BONDE LA USONGWE, WILAYA YA MBEYA VIJIJINI, MKOA WA MBEYA. MWANAFUNZI MMOJA WA KIDATO CHA TATU KATIKA SHULE HIYO ALIFAHAMIKA KWA JINA LA KILIAN MOSHI @ MSYANI (15) ALIGUNDUA KUUNGUA KWA BWENI HILO. MOTO HUO ULITEKETEZA VITANDA NANE NA MAGODORO NA MALI ZOTE ZILIZOKUWEMO NDANI YA BWENI HILO NA KUSABABISHA UHARIBIFU NA HASARA KUBWA.

CHANZO CHA MOTO HUO BADO HAKIJAFAHAMIKA. THAMANI HALISI YA MALI ILIYOTEKETEA KUTOKANA NA MOTO HUO PIA BADO KUFAHAMIKA. HAKUNA MADHARA YA KIBINADAMU YALIYORIPOTIWA KUTOKEA. AIDHA, MOTO HUO ULIZIMWA KWA JITIHADA ZA KIKOSI CHA ZIMAMOTO NA UOKOAJI, ASKARI POLISI NA WANANCHI.

KAMANDA WA POLISI MKOA WA MBEYA KAMISHINA MSAIDIZI MWANDAMIZI WA POLISI AHMED Z. MSANGI ANATOA WITO KWA WANANCHI KUCHUKUA TAHADHARI JUU YA MATUKIO YATOKANAYO NA MOTO IKIWA NI PAMOJA NA KUWEKA VIFAA VYA KUZIMIA MOTO KATIKA MAJENGO YAO ILI KUWEZA KUKABILIANA NA MAJANGA KAMA HAYO PINDI YANAPOTOKEA.

Monday, October 13, 2014

Wauguzi waombwa wasigome Liberia

Zaidi ya watu 4,000 wamefariki kutokana na Ebola katika kanda ya Afrika Magharibi
Maafisa wa afya nchini Liberia, wanawaomba wauguzi na wasaidizi wao kusitisha mpango wao wa mgomo wa kitaifa huku mlipuko wa Ebola ukiendelea kukithiri nchini humo.

Chama cha kitaifa cha wafanyakazi wa afya, kinataka serikali iwaongeze marupurupu kwa kuhatarisha maisha yao hasa kwa wale wanaowatibu wagonjwa wa Ebola.

Rais wa Marekani Barack Obama, ameamuru hatua zaidi kuchukuliwa za kuhakikisha wauguzi hawapatwi na ugonjwa huo.

Muuguzi mmoja ambaye alikuwa anamtibu mgonjwa wa Ebola yeye mwenyewe aliambukizwa ugonjwa huo.

Naibu waziri wa afya wa Liberia , Tolbert Nyenswah alisema ikiwa mgomo utafanyika sasa hivi utakuwa na athari kubwa kwa walioathirika na pia kuathiri hatua zilizofikiwa hadi sasa katika vita dhidi ya ugonjwa huo.

Serikali inasema kuwa janga la Ebola ni kubwa na ina maana kuwa serikali haiwezi kutimiza ahadi ya kuwalipa pesa zaidi wafanyakazi hao kwa kuhatarisha maisha yao.

Kiwango wanacho lipwa ni dola 500 kila mwezi , pamoja na mshahara wao wa kati ya dola 200 na 300.
Wauguzi hao sasa wanataka kulipwa dola 700 kama marupurupu ya kuhatarisha maisha yao wakiwatibu wagonjwa wa Ebola.

Wafanyakazi hao wa afya, pia wanataka vifaa vya kuwalinda kutokana na maambukizi pamoja na kupewa bima ya afya na serikali.

Wauguzi wengine 95 wamefariki kutokana na Ebola nchini humo.

Liberia ni moja ya nchi zilizoathirika vibaya sana na Ebola.

Zaidi ya watu 4,000 wamefariki kutokana na ugonjwa huo tangu ulipoanza kuwa kero hasa kwa mataifa ya Afrika Magharibi.

Chanzo;BBC SWAHILI

HABARI MPASUKO: TFF YAMSWEKA JELA MIAKA SABA WAKILI DAMAS NDUMBARO.

Habari ambazo zimetufikia hivi punde na ambazo hazijathibitishwa zinasema kuwa kamati ya nidhamu ya Shirikisho la soka nchi TFF, imemfungia wakili Damas Ndumbaro kujihusisha na mambo ya soka kwa muda wa miaka saba na faini ya kiasi cha pesa. 
Ndumbaro ambaye aliingia katika mzozo mkubwa na rais wa TFF, Ndugu, Jamal Malinzi wiki iliyopita baada ya TFF kuagiza kila klabu kukatwa asilimia tano za mapato yatokanayo na udhamini wa klabu hizo wanaoupata kutoka kwa Vodacom, wadhamini wakuu wa ligi kuu ya Tanzania Bara, na Azam Tv.
Ndumbaro alikimbilia katika vyombo vya habari na kusema wazi kuwa, klabu zimemuagiza kuwaambia TFF kuwa havipo tayari na havitakubali jambo hilo litokee, huku akijiamini na kuchambua baadhi ya vipengele na mambo ya sheria, Ndumbaro alivuka mipaka pale aliposema kuwa wanatafuta wastani wa wajumbe wa mkutano mkuu wa TFF na kupiga kura ya kutokuwa na imani na rais wa Shirikisho, Malinzi.
Kikao cha juzi cha kamati ya nidhamu kimefikia uamuzi wa kumfungia, Ndumbaro na kumlilipisha faini kwa sababu. Ndumbaro ambaye alizungumza kama wakili wa klabu za ligi kuu kupitia, Bodi ya Ligi amekanwa ‘ hadharani’ na vilabu huku vikisema kuwa ‘ havikumtuma’ kuzungumza yale ambayo alisema mbele ya vyombo vya habari. Klabu zimesema alizungumza kwa ‘ utashi’ wake mwenyewe, na si wao walimtuma.