Social Icons

ad3

ad3

ad2

ad2

ad1

ad1

Featured Posts

Sunday, June 10, 2018

DKT TIZEBA AAGIZA KUKAMATWA KIONGOZI WA AMKOS ALIYEFUJA MILIONI 23

Waziri wa Kilimo Mhe. Dkt Charles Tizeba akisisitiza jambo wakati akizungumza na wakulima wa pamba katika kijiji cha Msai wilaya ya Iramba  akiwa katika ziara ya kikazi ya siku mbili mkoani Singida kutembelea vituo na kujionea ununuzi wa pamba, Picha Zote Na Mathias Canal, WK
Waziri wa Kilimo Mhe. Dkt Charles Tizeba akisisitiza jambo wakati akizungumza na wakulima wa pamba katika kijiji cha Msai wilaya ya Iramba  akiwa katika ziara ya kikazi ya siku mbili mkoani Singida kutembelea vituo na kujionea ununuzi wa pamba, Kulia kwake ni Mkuu wa Wilaya ya Iramba Mhe Emmanuely Lwehahula.
Kituo cha ukusanyaji na ununuzi wa pamba katika kijiji na Kata ya Msai, Wilayani Iramba

Mkuu wa Wilaya ya Iramba Mhe Emmanuely Lwehahula akitoa salamu za shukrani kwa Waziri wa Kilimo Mhe. Dkt Charles Tizeba kwa kufanya ziara ya kuwatembelea  wakulima wa pamba katika kijiji cha Msai wilaya ya Iramba akiwa katika ziara ya kikazi ya siku mbili mkoani Singida kutembelea vituo na kujionea ununuzi wa pamba, 

Na Mathias Canal-WK, Singida

Waziri wa Kilimo Mhe. Dkt Charles Tizeba amemuagiza Mrakibu wa polisi Wilaya ya Iramba ASP Magoma Mtani kumkamata aliyekuwa mwenyekiti wa Bodi ya Chama cha ushirika (AMKOS) Msai.

Waziri Tizeba ametoa agizo hilo jana 9 June 2018 Mara baada ya kutembelea kitongoji cha Kati, Msai na Mtoa akiwa katika ziara ya kikazi ya Siku mbili kwa ajili ya kutembelea vituo vya ununuzi wa pamba na kujionea msimu wa ununuzi wa zao hilo katika vijiji hivyo.

Dkt Tizeba amelaani vikali ufujaji huo wa fedha za wakulima huku akimtaja Paul Ramadhan Kurwa kuhusika na ufujaji huo wa shilingi milioni 23 huku akiendelea kuonekana mtaani pasina kuchukuliwa hatua za kisheria.

"Wakati muelekeo wa serikali yetu inayoongozwa na Rais wetu Dkt John Pombe Magufuli ukijipambanua kutaka kuboresha maisha ya watanzania kupitia Kilimo lakini kuna watu wanataka kurudisha nyuma juhudi hizo, hakika tutawapa kibano kweli kweli hakuna utani kwenye fedha za wananchi" Alikaririwa Dkt Tizeba

Mhe Tizeba ametoa siku moja kukamatwa kwa mwizi huyo na kufikishwa mahakamani ili awe mfano kwa wezi wengine wasio kuwa na haya wala soni.

Aidha, amewataka wananchi katika msimu huu wa uuzaji na ununuzi wa Pamba kutouza Pamba zenye uchafu wakidhani wataongeza idadi ya kilo kwani kufanya hivyo ni kufifihisha juhudi zao wenyewe jambo ambalo halina tija.

Sambamba na hayo pia amewaondoa hofu wakulima kote nchini kuwa serikali ya awamu ya tano inatekeleza kwa vitendo ilani ya uchaguzi ya Chama Cha Mapinduzi yenye mkataba na wananchi katika kipindi cha miaka mitano 2015-2020.

Kwa upande wake Mkuu wa Wilaya ya Iramba Mhe Emmanuely Lwehahula amempongeza Waziri Tizeba kwa kutembelea maeneo mbalimbali ili kujionea ununuzi wa Pamba huku akiwasihi wananchi wilayani humo kulima kiasi kikubwa cha Pamba msimu ujao kwani mbegu na madawa ya kuulia wadudu vitatolewa bure kuanzia msimu ujao wa mwaka 2018/2019.

LESENI ZA UCHIMBAJI ZILIZODUMAA BILA KUFANYIA KAZI CHUNYA KUNYANG'ANYWA




 
Na Mary  Mwaisenye, Chunya.

Baraza la madiwani la Halmashauri ya wilaya ya Chunya mkoani Mbeya limekubaliana kupitia kuhakikisha wanayanyang'anya makampuni yote yaliyo shikilia leseni za tafiti kwa muda mrefu ili wachimbaji wadogo waweze kuyatumia maeneo hayo.

Makubaliano hayo yalifikiwa katika kikao cha robo ya Tatu kilichofanyika jana ambapo walisema wachimbaji wadogo wadogo wa madini ya dhahabu wamekuwa wakinyanyaswa na wachimbaji ambao wamekuwa wakishika leseni bila kuyatumia maeneo waliyopewa.

Akizungumza katika kikao hicho mbunge wa jimbo la Lupa Victor Mwambalaswa, alisema hawezi kuona wachimbaji wadogo wadogo wilayani kwake wakiwa wananyanyaswa na wachimbaji wakubwa ambao wamekuwa wakishikiria leseni kwa muda mrefu bila kuzitumia na kusubiri mchimbaji mdogo avumbue maeneo yenye dhahabu ndipo wanajitokeza na kusema ni maeneo yao.

Alisema yeye  kama kiongozi atahakikisha anamshauri waziri mwenye dhamana kuhakikisha wale walioshikiria maeneo hayo kuazia mwaka 2005 hadi sasa wanawaachia wachimbaji wadogo ili waweze kuyatumia ili kuepusha migogoro kati ya wachimbaji wadogo kwa wakubwa.

Mwenyekiti wa Chama cha Mapinduzi (CCM) wilaya ya Chunya Noeli Chiwanga alisema kuna haja ya serikali kuu kuhakikisha wanawatazama wachimbaji wadogo kwa jicho la tatu kutokana na kwamba wao ndio walioko maeneo husika na ndio wavumbuzi wakubwa wa maeneo hayo yalio na leseni lakini wanapochimba wanaambiwa eneo hilo lina leseni na mwenye leseni yuko Dar es salaam na wachimbaji wadogo kufukuzwa.

Chiwanga alisema kama mwenyekiti wa chama hafurahishwi kabisa na wachimbaji wadogo kufukuzwa katika maeneo ambayo wamekuwa wakiyavumbua hivyo anakubaliana na maamuzi ya baraza hilo la Madiwani kuazimia leseni za muda mrefu kufutwa.

Awali akifungua kikao hicho Mwenyekiti wa Halmshauri Bosco Mwanginde alisema kama baraza lazima waungane kwa pamoja katika kusimamia sheria na mipango yote inayowekwa baraza lao ili kuhakikisha maendeleo ya halmshauri yanasonga mbele.

Mwanginde alisema  pamoja na kuiomba serikali kuu kuzifuta leseni za muda na kupewa  wachimbaji wadogo wadogo pia aliomba madiwani kuhakikisha wanawaelimisha wachimbaji wadogo wadogo kuhusiana na tozo zilizowekwa na Halmshauri ili waone kulipa tozo hizo ni uzalendo katika kujenga wilaya yao.

Mwanginde pia alisisitiza madiwani kusimamia watendaji wa kata na vijiji kusimamia mapato hasa katika kipindi hiki cha mavuno ili waweze kukamilisha vyema robo iliyobakia ambapo alisema kwa sasa wamefikia 73%.
 
Mkuu wa wilaya ya Chunya Rehema Madusa akiwasilisha salamu zake kwa madiwani aliwataka watendaji wa halmshauri kuwa wabunifu wa vyanzo vya mapato ili kuongeza mapato ya Halmshauri na kufikia malengo yaliyowekwa na Serikali kuu.

Madusa pia aliwataka Madiwani kuhamasisha wananchi katika suala la maendeleo hasa katika ujezi wa madarasa na vyumba maalum vya wasichana wanapokuwa katika hedhi ili wasiweze kupoteza vipindi darasani.

MKUU WA WILAYA YA CHUNYA REHEMA MADUSA AANDAA FUTARI WILAYANI KWAKE




 Mkuu wa wilaya ya Chunya Mkoani Mbeya, Rehema Madusa akizungumza na Waislam na wasio Waislam wakati wa Futari aliyoiandaa wilayani humo jana.


Mkuu wa wilaya ya Chunya Rehema Madusa, jana amefuturisha Waislam na wasio Waislam, Viongozi wa vyama vya Siasa, viongozi wa madhehebu ya dini, viongozi wa boda boda, wazee maarufu, makundi ya vijana na watoto.

Lengo kuu la kufuturisha ni katika kuendeleza na kujenga amani na mshikamano wa Kitaifa usiojali dini, rangi wala kabila...

Mheshimiwa Madusa alisema katika hotuba yake kuwa "Sote tunao wajibu wa kuhakikisha mshikamano wetu unadumu na kuenziwa kwa dhana ya Umoja, Upendo na Amani" alisema Mkuu huyo wa Wilaya ya Chunya!! 

Alisisitiza kuwa kuilinda amani hakuna gharama...lakini inapotoweka...kuirudisha gharama yake ni kubwa na hakuna anayeweza kuirejesha kwa njia ya mkato!! 

"Tuilinde Amani yetu...Tuchape Kazi!! Viva Tanzania, Viva Chunya" alimaliza Mkuu huyo wa Wilaya.

Wednesday, May 23, 2018

DAWA ZAVUSHWA KUPITIA MTO WENYE MAMBA MKOANI RUVUMA


 Wakazi wa vijiji vilivyopo kandokando ya mto Ruvuma wilayani Nyasa mkoani Ruvuma na wafanyakazi wa Bobari ya Dawa (MSD), wakisaidia kushusha maboksi yenye dawa na kuyaingiza kwenye mtumbwi baada ya kupelekewa na MSD Kanda ya Iringa leo na baadae kuyapeleka katika Zahanati ya Kijiji cha Mitomoni.
 Maboksi ya dawa yakiingizwa kwenye mtumbwi.
 Wakazi wa Kijiji cha Mitomoni wakisubiri mtumbwi ili kuwavusha upande wa pili wa mto Ruvuma.
 Dawa zikipelekwa Zahanati ya Mitomoni
 Maboksi ya dawa kutoka MSD yakishushwa
 Wananchi wakishusha maboksi hayo kutoka katika mtumbwi.
 Mkazi wa Kijiji cha Mitomoni Khadija Salum, akizungumzia upatikanaji wa dawa kutoka MSD.
 Mkazi wa kijiji hicho, Mbwana Koloma, akizungumzia changamoto ya miundombinu ya barabara na jinsi wanavyopokea dawa kutoka MSD.
 Mwenyekiti wa kamati ya Afya wa Kijiji cha Mitomoni Omar Hassan akizungumza wakati wa kupokea dawa hizo.
Mmoja wa viongozi wa Kijiji cha Nakawale, Ima Komba akisaini fomu maalumu ya kupokelea dawa kutoka MSD.

Na Dotto Mwaibale, Ruvuma

WANANCHI wanaoishi katika Vijiji vya Mkenda na Mitomoni vilivyopo kandokando ya mto Ruvuma wilayani Nyasa mkoani Ruvuma wamesema changamoto kubwa waliyonayo ni 
mazingira magumu ya miundo mbinu ambayo inasababisha ugumu wa ufikishaji wa dawa, vifaa tiba na vitendanishi vya maabara kutoka  Bohari ya Dawa (MSD).

Wakazi hao wamesema kuwa, mazingira ya kufikisha dawa kwenye vijiji hivyo hutegemea zaidi usafiri wa kuvuka mto Ruvuma ambapo hulazimika kutumia boti,ambapo hata hivyo maisha yao yanakuwa na mashaka ndani ya mtumbwi hiyo ambayo iko wazi kutokana na mto huo kuwa na mamba wengi.

"Changamoto yetu kubwa ni usafishaji wa dawa kuja hapa kijijini kutokana na kutegemea zaidi mto huu ambao una mamba wengi, hata mwaka huu mwanzoni mtumbwi huu mnaouona ulipinduka na watu  wakiwapo wauza mitumba waliuawa na mamba; lakini tunashukuru  Bohari ya Dawa (MSD) kwani wao wanaweza kutuletea dawa  kwa wakati" alisema Mwenyekiti wa kamati ya Afya wa kijiji cha Mitomoni Omar Hassan.

Alisema ili kuondoa changamoto hiyo, wanaiomba serikali kuhakikisha inaboresha miundombinu ya barabara, ili dawa hizo zisafirishwe kwa njia ya barabara badala ya kutegemea mto huo. 

Alisema yeye na kamati yake wamekuwa wakipokea dawa mara nne kwa mwaka kutoka MSD na kuzihakiki kwa ajili ya matumizi.

"Pamoja na changamoto ya miundombinu lakini tumekuwa tukihakikisha dawa zinazoletwa na MSD zinafika kituoni na kutumika ipasavyo,"alisema.

Alisema kutoka Songea mjini hadi Kijiji cha Mitomoni, Songea vijijini, katika kituo hicho cha afya ni km 135 na MSD imekuwa ikihakikisha dawa hizo zinafika.

Alisema changamoto zinakuwa kubwa zaidi kipindi cha mvua kwa kuwa miundombinu ya barabara hadi kufika kivukoni ni tatizo na kuna wakati dawa zinafika usiku na zinatakiwa kuvushwa usiku huo huo.

Hassan alisema changamoto hiyo ya mamba katika mto huo anaijua vizuri kwani mtoto wake Sanifu Omar (27), alipoteza maisha kwa kuliwa na mamba wakati alipokuwa akisafirisha abiria kwa kutumia mtumbwi.

Mkazi wa Kijiji cha Mitomoni Khadija Salum alisema wamekuwa wakipata dawa zote muhimu katika kituoni hicho ikiwemo za mama mjamzito na mtoto bila ya ubaguzi na kwa wakati.

"Mimi nina watoto watano kuanzia ujauzito wa kwanza sijawahi kukosa dawa hapa pamoja na ugumu wa miundombinu lakini dawa zinafika hivyo serikali ione haja ya kuboresha barabara zetu," alisema.

Mganga Mfawidhi wa Zahanati ya Mitomoni, Ivo Hekela, alisema kijiji hicho kinahudumia agonjwa 12,000 kutoka vijiji vitano ambavyo ni Mitomoni, Mipotopoto,Konganywita,Mkenda,Uhuru na Mozambique. 

Meneja wa MSD Kanda ya Iringa, John Sipendi, alisema wamekuwa katika changamoto ya kufikia vituo hivyo vya pembezoni ikiwa ni pamoja na kutumia muda mrefu kufikisha dawa na wakati wa mvua kukwama kwa magari njiani na gharama za usafirishaji kuogezeka.

Madereva wa MSD Kanda ya Iringa wamesema wamekuwa wakishindwa kushusha dawa wakati wa mvua za masika kutokana na mto huo kujaa maji hivyo hulazimika kulala kijijini hapo kwa siku mbili hadi tatu.

TAASISI YA MO DEWJI YATOA MSAADA KWA WATOTO WENYE SARATANI



Taasisi ya Mo Dewji imetoa msaada kwa watoto wanaopatiwa matibabu ya magonjwa ya saratani katika kituo cha Tumaini la Maisha katika hospitali ya Taifa Muhimbili, Jijini Dar es Salaam.

Msaada ambao umetolewa ni unga wa ngano, khanga na sabuni za kuogea, kufua na kunawia mikono.

Akikabidhi msaada huo, Kaimu Meneja Miradi wa Taasisi ya Mo Dewji, Belinda Paul alisema taasisi yao itaendelea kuwa na utaratibu wa kutoa msaada katika kituo hicho ili kuwafariji watoto ambao wanapatiwa matibabu.

Alisema hiyo sehemu ya kwanza kutoa msaada kwani wamekuwa na utaratibu wa kusaidia jamii kutokana na uhitaji uliopo hivyo kwa kufanya hivyo wanaamini watakuwa wamegusa maisha ya Watanzania wengi.

Aidha, Paul amewataka watu wengine wenye uwezo kuweka utaratibu wa kusaidia watu wengine wenye uhitaji kama watoto waliopo katika kituo cha Tumaini la Maisha.

Kaimu Meneja Miradi wa Taasisi ya Mo Dewji, Belinda Paul akiwa katika picha ya pamoja na baadhi ya watoto ambao wanapatiwa matibabu katika kituo cha Tumaini la Maisha.

Kaimu Meneja Miradi wa Taasisi ya Mo Dewji, Belinda Paul akiwa katika picha ya pamoja na baadhi ya wasimamizi wa kituo cha Tumaini la Maisha wakati walipokuwa wakikabidhi msaada katika kituo hicho.

Wanafunzi wa Chuo Kikuu cha Dar es Salaam (USDM) ambao wanalipiwa gharama za masomo na Taasisi ya Mo Dewji wakiwa katika picha ya pamoja na baadhi ya watoto wanaopatiwa matibabu katika kituo cha Tumaini la Maisha.

Sunday, March 18, 2018

SAUTI YA NYIKANI......... Rais Magufuli watibu Watanzania kwa Tsh 70,000




NA GORDON KALULUNGA

MAENDELEO ya kiuchumi ya Taifa lolote hutegemea zaidi ubora wa afya za wananchi wake kwa hiyo mifumo ya afya inayoimarisha upatikanaji, ufanisi, urahisi wa kuzifikia na kuzimudu gharama za matibabu ni muhimu katika kuondoa sio tu janga la maambukizi  ya magonjwa bali pia kuondoa ufukara miongoni mwa wananchi.



Utoaji wa huduma za afya kwa watu wote (Universal health Coverage) ni wazo liliasisiwa na katiba ya Shirika la afya duniani ya mwaka 1948 iliyoazimia ya kwamba huduma bora za afya ni haki ya msingi ya kila mtu na mpango wa afya kwa wote ni azimio la Alma Ata lililopitishwa mnamo mwaka 1978 na Tanzania ilisaini maazimio hayo.



Kwa mujibu wa ripoti ya Shirika la Afya duniani (WHO) ya mwaka 2005, mzigo wa kugharamia huduma za afya kwa malipo ya pesa taslimu kutoka mifukoni inapelekea watu milioni mia moja kuingia kwenye lindi la umaskini kila mwaka.



Wengi wao wapo katika nchi za kusini mwa jangwa la sahara ikiwemo Tanzania na sababu kubwa ikiwa ni mifumo dhaifu iliyopo ya kugharamia huduma za afya na bima za afya na matokeo yake ni kuongezeka kwa maambukizi  ya magonjwa na kupungua kwa nguvu kazi ya Taifa.



Kwa mujibu wa utafiti uliofanywa na Benki ya Maendeleo ya Afrika mwaka 2010 nchini Rwanda, malipo ya pesa taslimu na gharama kubwa za huduma za afya ilisababisha wananchi kupunguza matumizi ya huduma za afya kwani idadi ya wagonjwa waliojitokeza katika vituo vya afya ilipungua sana kwa kuwa wengi wao hawakumudu kulipia huduma za afya.



Utafiti uliofanywa na Onah na Govendor mwaka 2014 nchini Nigeria ilibainika kuwa baadhi ya mambo yanayosababisha kuwepo na utofauti katika kuzifikia huduma za afya kwa makundi hatarishi hasa akina mama wajane ni mifumo mibaya ya kugharamia huduma za afya na gharama kubwa za afya.



Baadhi ya waliohojiwa  katika utafiti huo walieleza kuwa inapotokea wanapata maambukizi ya magonjwa na wakati huo hawana pesa ya kulipia vipimo pamoja na dawa, hulazimika kuchukua akiba ya pesa ya chakula, ada
ya shule au mtaji wa biashara anayoifanya ili kugharamia huduma hizo, hata hivyo atahudhuria hospitali endapo tu ugonjwa huo utakuwa mkubwa au homa hiyo itakuwa kali sana.



Hali hii pia inawakumba wananchi wa Tanzania kwani huduma za afya ni ghali mno na wengi wao hawawezi kuzimudu. (Nazungumzia masikini) ila sina uhakika na baadhi ya waajiriwa wa vyama vya siasa ikiwemo CCM.



Ripoti ya wizara ya afya na ustawi wa jamii ya mwaka 2004, inaeleza kwamba mara baada ya uhuru, Serikali ya Tanzania kupitia wizara ya afya ilianza kutoa huduma za afya bure kwa wananchi wote.

Lakini kufuatia mdororo wa kiuchumi katika miaka ya sabini, kuongezeka kwa idadi ya watu na kuongezeka kwa maambukizi ya magonjwa mapya ilipelekea serikali kushindwa kuendesha hospitali na vituo vya afya katika ngazi zote na hivyo kuleta matatizo makubwa katika mfumo wa afya.



Ni katika miaka hiyo ndipo serikali ilianza kufikiria mfumo wa uchangiaji wa huduma za afya kwa kuanzisha ada ya kutumia huduma za afya yaani user fee, Bima za afya kwa wafanyakazi na wasio wafanyakazi hata hivyo baada ya miaka 50 ya uhuru tatizo bado ni kubwa na mifumo hiyo haijafanikiwa na sababu ikiwa ni gharama kubwa za dawa na vifaa tiba.



Hata sasa kati ya wagonjwa kumi ambao wanafika hospitali na kutakiwa kulipia Tsh 10,000/= kununua dawa wanaomudu huwa hawazidi wagonjwa watano, na watano wengine aidha hawanunui kabisa au wanaomba wanunue nusu dozi kwanza na nusu dozi nyingine wakiahidi kununua pindi wapatapo pesa.



Nimewahi kufanya utafiti, moja ya swali nililododosa ni hili, (unafikiri nini kinaweza tokea endapo mtu ambaye hana uwezo wa kulipia gharama za afya ataumwa?).



Wengi wao walijibu ya kwamba mambo mawili yanaweza kujitokeza, moja kama ana akiba itabidi atumie akiba yake katika matibabu na hivyo kuendelea kuwa maskini zaidi au pili kukosa matibabu na hivyo kupoteza maisha.

Tafsiri yake ni kwamba gharama kubwa katika upatikanaji wa huduma za afya kwa watu wenye kipato cha chini unapelekea kuongezeka kwa umaskini miongoni mwa wananchi na kuongezeka kwa idadi ya vifo na hivyo kupoteza nguvu kazi ya Taifa.

Nakumbuka vema Rais wa Tanzania wa awamu ya tano, Dkt. John Pombe Magufuli, Agosti 23, mwaka 2015, wakati chama chake (CCM) kikiwa kinazindua kampeni katika viwanja vya Jangwani jijini Dar es Salaam, alisema anakerwa na atashughulikia suala la ukosefu wa dawa katika hospitali zetu hapa nchini.

Ameanza vizuri sana chini ya Waziri shupavu Ummy Mwalimu licha ya changamoto zinazoendelea kufanyiwa kazi.

Mbali na dawa kuna suala la Bima za Afya ambapo zipo za mafukara ziitwazo Bima ya Afya ya jamii (CHF) ambayo inakabiliwa na changamoto nyingi ikiwemo kutotambuliwa pale mgonjwa anapotakiwa kulazwa, anapopatwa na ugonjwa nje ya wilaya aliyopatiwa kadi hiyo au kupata baadhi ya vipimo na dawa hata ndani ya wilaya husika.

Pia zipo bima za watanzania wenye hadhi ziitwazo Bima ya Afya ya Taifa (NHIF) ambazo zinamwezesha mwenye kadi ya bima hiyo kutibiwa popote.

Kwa kuwa nchi yetu ni ya ujamaa na inajali utu na hadhi ya uswa wa binadamu, kama inaweza kumpendeza Mheshimiwa Rais Dkt. Magufuli na mamlaka zake ni vema kuliangalia jambo hili na ikiwezekana kupitia mfuko huo wa Bima ya Afya ya Taifa, watanzania waweze kukata bima zenye hadhi ya kutibiwa popote kwa shilingi hata 70,000 kwa kila mwaka.

Kwa sasa kuna bima ya watoto kupitia mfuko huo ambayo haizidi Tsh 55,000 kwa mwaka, hivyo nadhani ni vema sasa kama taifa tukawa na usawa au kupunguza “Gape” la masikini na walionacho kupitia huduma za Afya.

Na katika suala la Toto Afya kadi, inadhihilisha kabisa kuwa utoaji wa matibabu bure kwa watoto chini ya miaka Mitano kama ilivyo katika sera ya Afya ya mwaka 2007 tumeshindwa na ushahidi wa hili upo wazi.

Hivyo ni rai yangu kwa Mheshimiwa Rais Dr. John Pombe Joseph Magufuli kama itampendeza akaamuru watanzania wanaohitaji kadi za matibabu za NHIF wakalipa kwa bei niliyoipendekeza au chini ya hapo kwasababu siyo kila mmoja atakayekuwa na kadi hiyo ataumwa kwa mwaka huo.


Nimeona niandike makala hii kwasababu mifumo ya kugharami huduma za afya hapa nchini na soko holela la dawa na vifaa tiba inasababisha uwepo wa bei kubwa ya dawa na vifaa tiba katika sio tu hospitali zetu bali na maduka ya dawa binafsi.

Pia sababu nyingine iliyonisukuma ni baada ya kuona huduma za afya zinazidi kutolewa katika mtazamo wa kibiashara na sio mtazamo wa kihuduma (Business oriented and not service oriented.)

Wakati Maandiko yanasema kuwa hekima ya masikini huwa haisikilizwi, bahati nzuri tuliyoipata Watanzania, Rais wetu anasikiliza hekima za masikini.

Karibuni Nyikani.

Mwandishi wa makala hii ni mbobezi wa Habari za uchunguzi katika nyanja za Afya ya Uzazi, Dawa za kulevya na Viwanda.

Anapatikana kwa anuani yake
       Gordon Kalulunga(Development Journalist),
    Information and Media Consultant,
    P.O. Box 705, Mbeya-Tanzania.
    CELL: 255 (0)754 440749/ WHATSApp 255 (0)765 615858
    E-MAIL: kalulunga2006@gmail.com

Monday, March 05, 2018

Wahalifu Mbeya wazidi kukiona cha moto


JAMHURI YA MUUNGANO WA TANZANIA
WIZARA YA MAMBO YA NDANI YA NCHI
JESHI LA POLISI TANZANIA

                         Ofisi ya Kamanda wa Polisi,                                                                                                                                                                                                   Mkoa  wa  Mbeya,                                                                                  
Namba ya simu 2502572                                                                                                S. L. P. 260,
Fax - +255252503734                                                                                    MBEYA.
E-mail:- rpc.mbeya@tpf.go.tz
              tanpol.mbeya@gmail.com
                                                       
TAARIFA YA JESHI LA POLISI MKOA WA MBEYA KWA VYOMBO VYA HABARI “PRESS RELEASE” TAREHE 05.03.2018.

Jeshi la Polisi Mkoa wa Mbeya limeendelea kukabiliana na vitendo vya uhalifu ili kuhakikisha kuwa wageni na wakazi wa Mkoa huu wanaendelea kuwa salama na mali zao. Aidha Jeshi la Polisi Mkoa wa Mbeya linaendelea kushirikiana na wananchi na wadau wengine wa usalama hali inayopelekea kupata mafanikio makubwa ikiwa ni pamoja na kukamata watuhumiwa mbalimbali wa uhalifu, silaha na vifaa mbalimbali vya kutengenezea silaha.

KUKAMATWA KWA WATUHUMIWA WA TUKIO LA MAUAJI WAKIWA NA SILAHA.

Jeshi la Polisi Mkoa wa Mbeya mnamo tarehe 03.03.2018 majira ya saa 18:30 jioni liliendelea na msako mkali uliofanyika huko maeneo ya Itezi – Uyole, Kata ya Itezi, Tarafa ya Iyunga hapa Jijini Mbeya na kufanikiwa kuwakamata watu watano [05] wakiwa na Silaha bunduki aina ya Pump Action Shortgun yenye namba 009009906-MP-18EM-M mali ya SUMA JKT ikiwa imefichwa nyumbani kwenye Stoo ya kuhifadhia vitu mbalimbali.

Watuhumiwa waliokamatwa wamefahamika kwa majina ya:-

1. HAMIS SHABAN [19] Mkazi wa Itezi
2. IBRAHIM MBILINYI [22] Mkazi wa Itezi
3. STAN WEMA [21] Mkazi wa Uyole
4. BAHATI LAULENDI [22] Mkazi wa Iduda
5. SAMBAA SAMSON [32] Mkazi wa Isyesye

Watuhumiwa baada ya kupekuliwa walikutwa na silaha nyingine ambazo ni:-
1. Mapanga matatu [03].
2. Maganda matatu tupu ya risasi





Mnamo majira ya saa 01:30 usiku wa kuamkia tarehe 26.02.2018 huko maeneo ya Kituo cha Mafuta kiitwacho MANYANYA kilichopo Uyole, Kata ya Nsalaga, Tarafa ya Iyunga, Jijini Mbeya, watu wasiofahamika majina walimvamia mlinzi wa SUMA JKT aitwaye CHEWE WILSON [34] Mkazi wa Iduda, Mlinzi wa Suma JKT akiwa lindoni katika Kituo cha mafuta cha MANYANYA kilichopo Uyole na kisha kumjeruhi mlinzi huyo kwa kumkata kwa panga sehemu za kichwani na mguu wa kulia na kisha kumpora silaha bunduki aina ya Shortgun mali ya SUMA JKT na kutoweka nayo.

Na mnamo tarehe 01.03.2018 majira ya saa 06:00 asubuhi CHEWE WILSON [34] alifariki dunia akiwa anaendelea kupatiwa matibabu katika Hospitali ya Rufaa Mbeya kutokana na majeraha aliyoyapata sehemu ya kichwani na mguu wake wa kulia.

Kutokana na tukio hilo, Jeshi la Polisi Mkoa wa Mbeya lilifanya msako mkali na kufanikiwa kuwakamata watuhumiwa watano [05] ambao baada ya kuhojiwa wamekiri kuhusika katika tukio hilo. Watuhumiwa watafikishwa Mahakamani kwa hatua zaidi za kisheria mara baada ya Upelelezi kukamilika.


KUKAMATWA WATUHUMIWA WAWILI WAKIWA NA SILAHA [GOBORE].

Mnamo tarehe 03.03.2018 majira ya saa 12:00 mchana, Jeshi la Polisi Mkoa wa Mbeya liliendelea na misako mikali katika maeneo mbalimbali ya Mkoa wa Mbeya. Katika msako uliofanyika huko Kitongoji cha Kibaoni, Kijiji na Kata ya Kambikatoto, Tarafa ya Kipembawe, Wilaya ya Chunya, Jeshi la Polisi lilifanikiwa kuwakamata watu wawili wakiwa na bunduki aina ya Shortgun iliyotengenezwa kienyeji pamoja na vifaa mbalimbali vinavyotumika kutengenezea bunduki.

Watuhumiwa waliokamatwa wamefahamika kwa majina ya:-
1. FADHILI MAYEGA [60] Mkazi wa Kambikatoto
2. MASHAKA SAMWEL [38] Mkazi wa Kambikatoto

Aidha baada ya watuhumiwa kupekuliwa walikutwa na bunduki hiyo pamoja na vifaa mbalimbali vinavyotumika kutengenezea bunduki aina ya shortgun za kienyeji ambavyo ni:-
1. Mkono wa kuwekea risasi kwenye bunduki [Cocking Handle]
2. Unga wa Baruti wenye uzito wa gramu moja.
3. Mafuta ya kusafishia bunduki
4. Risasi 25 zilizotengenezwa kienyeji
5. Tupa 10
6. Chuma kimoja cha kukatia risasi
7. Tindo za kukatia mawe
8. Vipande vya vyuma viwili [02]
9. Visu vitano [05]


10. Nyundo kubwa mbili.
11. Praise moja
12. Bisibisi moja
13. Mguu wa Pedal ya Baiskeli
14. Triger 2

Watuhumiwa watafikishwa Mahakamani kwa hatua zaidi za kisheria mara tu baada ya upelelezi kukamilika.


WITO:

Kamanda wa Polisi Mkoa wa Mbeya Naibu Kamishina wa Polisi MOHAMMED R. MPINGA anatoa wito kwa vijana na jamii kwa ujumla kuacha tamaa ya kupata mali kwa njia zisizo halali kwa kujihusisha na vitendo vya uhalifu kwani ni kinyume cha sheria na badala yake wajishughulishe na kazi halali kwa ajili ya kujipati kipato. Aidha Kamanda MPINGA anatoa onyo kali kwa yeyote atakaye jihusisha na uhalifu, Jeshi la Polisi Mkoa wa Mbeya lipo imara kuhakikisha usalama wa raia na mali zao na halitasita kumkamata na kumfikisha Mahakamani mtu/watu au kikundi cha watu watakaojihusisha na uhalifu kwa hatua zaidi za kisheria. Pia Kamanda MPINGA anaendelea kuomba ushirikiano kwa raia wema, viongozi wa mitaa kuendelea kutoa taarifa kwa Jeshi la Polisi ili wahusika wakamatwe na kuchukuliwa hatua za kisheria.


             Imesainiwa na:        
[MOHAMMED R. MPINGA - DCP]
KAMANDA WA POLISI MKOA WA MBEYA

Saturday, February 24, 2018

MAKUFULI KUFUNGWA KESHO MBEYA



  Mashabiki mbalimbal;i wakiwa wamefurika kwenye uwanja wa Tandale mjini Tukuyu.(Picha kwa hisani ya dinaismail.blogspot.com)
*Tukuyu wangoja majaliwa kupanda daraja

* Ifisi yasubiri suluhu


NA GORDON KALULUNGA, RUNGWE


LIGI daraja la Tatu ngazi ya Mkoa wa Mbeya hatua ya timu sita bora, inatarajiwa kutia nanga kesho katika viwanja mbalimbali huku ubingwa ukinukia kwa timu mbili ambazo ni Tukuyu Star (Banyambala) na Ifisi Hospital FC (Wadunga Sindano).



Mechi hiyo ambayo inatarajiwa kupigwa kesho katika uwanja wa Tandale uliopo mjini Tukuyu wilayani hapa, imekuwa gumzo katika mitaa mbalimbali ya wilayani Rungwe vikiwemo vijiwe kadhaa katikati ya mji huu wa Tukuyu.



Timu ya Tukuyu Star ili kupata ubingwa huo wa Mkoa wa Mbeya, inahitaji kuifunga timu ya Ifisi ambayo ina pointi 10 dhidi ya pointi 9 za wenyeji Tukuyu Star.



Wakati wenyeji Tukuyu wakiwa wanafanya kila aina ya ufundi wa kuweza kushinda mechi hiyo ya kesho, timu ya Ifisi FC wao wanahitaji kupata suluhu ya aina yeyote kisha kubeba ubingwa huo na kupanda daraja kuelekea daraja la pili.



Wachezaji wa timu ya Ifisi ambao tayari wametinga mjini Tukuyu jana, leo asubuhi wameonekana katika uwanja wa Katumba Two ambako taarifa zisizorasmi zinasema kuwa mtanange wa timu hizo unaweza kuhamishiwa katika uwanja huo kutoka Tandale.



Mpaka sasa msimamo wa ligi hiyo inajiweka wazi kuwa Ifisi Hospital FC ina pointi 7, Tukuyu Star pointi 9, Iduda FC pointi 7, Yosso FC pointi 3, Syukula FC pointi 3 na Ilomba FC pointi 0.