TANGAZO

Monday, March 22, 2010

WANAWAKE WATAKIWA KUJITOKEZA KUTIBIWA FISTULA.

WITO umetolewa kwa wanawake wanaosumbuliwa na tatizo la kutokwa na mkojo mfululizo na haja kubwa katika sehemu zao za siri (Fistula) kujitokeza kupata matibabu yanayotolewa bure katika hospitali ya Mbalizi iliyopo wilaya ya Mbeya Vijijini na kumilikiwa na kanisa la Uinjilisti Tanzania na kuwa na ubia na Serikali.

wakizungumza mwishoni mwa wiki katika mahojiano maalum katika hospitali hiyo, Mganga Mkuu wa Hospitali hiyo Msafiri Kimaro na Ofisa Muuguzi Mkuu Roda Kasongwa walisema kuwa hospitali hiyo inawatibu wagonjwa wenye matatizo hayo bila kuwatoza gharama zozote.

Mganga Mkuu wa hospitali hiyo alieleza kuwa ugonjwa huo umewaathiri zaidi mabinti wanaopata mimba chini ya miaka 20 na baadhi ya wanawake wanaojifungua katika uzao wao wa kwanza.

‘’Wanaoathirika zaidi ni wale wanaopata mimba wakiwa chini ya umri wa miaka 20 na baadhi wanaojifungua katika uzao wao wa kwanza hasa wanaotoka vijijini ambako huduma za Afya ziko mbali nao’’

‘’Mwaka jana 2009 wanawake watano walijitokeza na kubainika kuwa walikuwa na Fistula kutoka maeneo ya vijijini ambapo wawili walitoka eneo la Kamsamba wilayani Mbozi, Mmoja alitoka mjini Tunduma wilayani Mbozi na wawili walitoka eneo la Ikukwa Mbeya Vijijini’’ alisema Kimaro.

Aidha alifafanua kuwa, ugonjwa huo katika wilaya ya Mbeya Vijijini upo ambapo kwa mara ya kwanza katika hospitali hiyo walifanikiwa kuwatibu wagonjwa wawili ambao mmoja alipata ugonjwa huo mwaka 1961 na mwingine alipata tatizo hilo mwaka 1978.

Naye Ofisa Muuguzi Mkuu wa hospitali hiyo Roda Kasongwa ambaye ana uzoefu wa miaka 40 katika tasinia ya Afya hapa nchini, alifafanua kuwa wanawake wengi hawajitokezi kutibiwa kitaalam baadhi wakidhani kuwa kuna ghamama za matibabu na wengine ni kuwa mbali na huduma za Afya kutokana na ubovu wa miundombinu.

‘’Katika hospitali yetu tunatoa matibabu ya Fistula bure kwa wanawake wenye matatizo ya kuvuja mkonjo na mtaalam wa tatizo hilo ni Doctor Kimaro na kuna wanawake ambao matatizo yao yalikuwa makubwa zaidi tuliwapeleka hospitali ya CCBRT iliyopo Dar es Salaam kwa gharama za hospitali’’

‘’Wale wanaofanikiwa kutibiwa tatizo hilo tunawapatia pia nauli za kuwafikisha mpaka nyumbani kwao ama maeneo wanayoishi na hiyo yote inatokana na kutambua umuhimu wa kuwahudumia wanawake hapa nchini ambao ni nguzo za familia’’ alisema Kasongwa.

Hata hivyo Mganga Mkuu wa hospitali hiyo alitoa angalizo kuwa wagonjwa wanaotibiwa fistula wanapaswa wanapopata ujauzito kuwa karibu na Hospitali kwasababu wanatakiwa kujifungua kwa njia ya upasuaji na kama wakijifungua kwa njia ya kawaida tatizo la Fistula linaweza kujirudia kutokana na mgandamizo unaojitokeza wakati wa kujifungua.

Mwisho.

RAIS JAKAYA KIKWETE KUKUMBANA TENA NA KIKWAZO MBEYA

RAIS wa Jamhuri ya Muungano wa Tanzania Jakaya Mrisho Kikwete anatarajia kukutana na kikwazo katika uzinduzi wa kiwanda cha bia cha TBL kilichopo mkoani hapa wakati wa ziara yake ya siku tatu inayotarajia kuanza wiki hii mkoani Mbeya.
Kikwazo kinachotarajia kumkuta Rais Kikwete ni wadau mbalimbali wa sekta ya kilimo kupinga kwa nguvu zao zote kampeni ya wakulima kuanza kilimo cha zao la biashara aina ya Shayili zao linalotumika kutengengeneza pombe na kuachana na mazo ya chakula.

Baadhi ya wadau waliohojiwa wameeleza kuwa dhana ya kilimo kwanza iliyozinduliwa na serikali kwa lengo la kumwezesha mkulima kuwa na uhaika wa chakula na kipato sasa imeingia dosari mkoani hapa baada ya wakulima wengi kutaka kuachana na kilimo cha mazo ya chakula.

Uchunguzi wa kina na uhakika uliofanywa umebaini kuwa maelfu ya wakulima katika kanda ya Nyanda za juu kusini wamejiandisha kwa ajili ya kuanza kulima zao la Shayili ambalo linatumika kutengenezea pombe.
Nakala ya orodha ya majina ya wakulima wakubwa wa kati na wadogo waliojiandikisha katika Halmashauri za wilaya ya Mbozi, Chunya, Ilieja, Mbeya Vijijini na Rungwe ipo na wameamua kuachana na kilimo cha mazo ya chakula na badala yake kujikita katika kilimo cha zao hilo ambalo litakuwa na soko katika kiwanda cha TBL kilichojengwa hivi karibuni mkoani hapa.

Hatua ya wakulima hao kuamua kuachana na kilimo cha mazao ya chakula kumetokana na hamasa waliyoipata tangu mwaka jana Rais Jakaya Kikwete alipotembelea kiwandani hapo na kuhakikishiwa kuwa na soko la uhakika wa zao hilo la Shayili katika kiwanda hicho cha bia ambacho kinatarajiwa kuzinduliwa rasmi na Rais Jakaya Kikwete katika ziara yake.

Kiwanda hicho kilichopo eneo la Iyunga ndani ya Jiji la Mbeya, kimeelezwa kuwa kina uhitaji mkubwa wa zao hilo la Shayili kwasababu ni malighafi muhimu kwa uzalishaji wa pombe.

Mratibu wa mpango wa kilimo nchini (ASDP) Enock Nyasebwa ambaye alikiri kuwepo kwa hali hiyo ingawa alieleza wazi kuwa baadhi ya wadau muhimu hawakushirikishwa katika mpango wa hamasa kwa wakulima.

‘’Nimepata taarifa za wakulima wengi kujiandikisha kwa ajili ya kilimo cha Shayili lakini kwa sasa siwezi kulitolea ufafanuzi wa kina maana hatujashirikishwa kimamilifu katika hamasa hiyo’ alisema Nyasembwa.

Taarifa za uhakika kutoka ndani ya kampuni hiyo ya bia ya TBL na ndani ya Halmashauri zilizoandikisha wakulima kwa ajili ya kilimo hicho zimeeleza uwa mpango huo una baraka za chini chini kati ya baadhi ya watendaji wa Halmashauri na viongozi wa TBL.

Pamoja na hayo imeelezwa kuwa Serikali kama haitachukua hatua mara moja na wakulima kuendelea kuhamasishwa kulima zao hilo la Shayili kwa ajili ya kutengenezea pombe badala ya mazaoya chakula utekelezaji wa kilimo kwanza utabaki kuwa wa kisiasa zaidi na badala yake watakaoendelea kuneemeka ni wafanyabiashara na baadhi ya watawala.

Kutokana na hali hiyo, baadhi ya waandishi wa habari wa mkoa wa Mbeya wameeleza kuwa ndiyo chanzo cha wao kutoalikwa katika kuandika hali halisi ya utendaji kazi wa kiwanda hicho badala yake wamekuwa wakialikwa mara kwa mara waandishi kutoka Dar es Salaam ambao hawajui uhalisia wa kiwanda hicho na mustakabali wa wakulima wa Mbeya na wananchi kwa ujumla.

Mwisho.

UKWELI WA MGOGORO WA MASHARIKI YA KATI.

KUMEKUWA na makala nyingi juu ya suala la mgogoro wa Mashariki ya Kati  na tangu Disemba 27 hadi 18 Januari 2009 vyombo vya habari duniani vilitawaliwa na taarifa za mapigano kati ya Israel na kundi la Hamas la Palestina. Katika vita hiyo takriban wapalestina 1300 na Waisraeli 13 walipoteza maisha.

Dunia imegawanyika huku upande mmoja ukiunga mkono kundi la Hamas na wengine wakiiunga Israel. Ili kujua uhalisia wa mapigano hayo tazama historia ya mataifa hayo.

Madai ya Waisraeli yanaanzia katika misingi ya kidini ambapo katika Biblia (kitabu kitakatifu kwa Wakristo na Wayahudi), kitabu cha kwanza cha nabii Musa kiitwacho Mwanzo sura ya 12 inaonesha jinsi Ibrahim anavyoitwa na mwenyezi Mungu ili kumtumikia.

Eneo hilo la Palestina (zamani lilijulikana kama Kaanani)ndiyo chimbuko la dini kuu tatu zenye msingi wa Ibrahim ambazo ni dini ya Wayahudi, Ukristo na baadaye Uislam.

Dini ya wayahudi yenye misingi ya Biblia Agano la Kale likianza na vitabu vitano vya Musa (Mwanzo, Kutoka, Hesabu, Mambo ya Walawi na Kumbukumbu la torati), Ukristo ukianza misingi kwenye Agano la Kale hadi Agano Jipya na Uislam ukishika vitabu vinne Tourat ya nabii Musa (a.s), Zabur ya nabii Dawood (a.s), Injili ya Issa bin Mariam (a.s.) au Yesu na Quran ya Muhamad (s.a.w)

Ibrahim mwenyeji wa Uru wa Ulkadayo (Mesopotamia) leo Iraq wa kabila la Waebrania anahama kutoka Iraq na kwenda Haran Syria na baadaye kutelemkia Kaanani (Uyahudi) ambapo Mwenyezi Mungu anamtokea katika njozi na kumwapia Ibrahimu kuwa ardhi yote hiyo amepewa yeye na uzao wake na kuahidiwa baraka yaani kubarikiwa kwa kila atakaye mbariki na kwamba jamaa zote za dunia zitajibarikia.

Pamoja na ahadi hiyo Mungu anamwambia nabii Ibrahimu kuwa uzao wake utakwenda utumwani Misri kwa miaka mia nne hadi kizazi cha nne ndipo watakapookolewa na kupandishwa Kaanani (Palestine).

Mizizi ya ugomvi huo inaanzia karne ya 19 wakati wa vuguvugu la utaifa la Uzayuni na Uarabu (Arab nationalism) vuguvugu la wayahudi (Jewish National Movement) lilianzishwa kuwa la kisiasa mwaka 1892 dhidi ya Urusi na Ulaya. Mkakati ulianza kwa wayahudi wote popote walipo kurejea katika nchi ya Palestina ambapo walipachukulia kuwa ndiyo nchi yao ya asili.

Katika kutimiza azma yao World Zionist Organization na Jewish National Fund walihimiza uhamiaji na kufadhili ununuzi wa ardhi chini ya utawala wa Ottoman na Uingereza katika Palestina.

Mgongano huo ukianzishwa na Uingereza kwa kile kilichafahamika kama Hussein-McMahon Correspondence na Balfour Declaration of 1917, na kufuatiwa na milipuko ya mapigano ya mara kwa mara kati ya Wayahudi na Waarabu katika eneo la Palestina.

Hakuna asiyekumbuka jinsi kiongozi wa Wanazi Adolf Hiltler alivyowafanyia wayahudi kwa maangamizi makuu ya Nazi Holocaust, ikiwa ni jitihada ya kulifuta taifa hilo..

Azimio la Umoja wa Mataifa la mwaka 1947 liliridhia kugawanywa kwa nchi ya Palestina kwa wayahudi na wapalestina ambapo wayahudi walikubali na wapalestina wakiungwa mkono na Umoja wa Nchi za kiarabu wakikataa na kusababisha kuzuka vita baina yao.

Vita hivyo viliwafanya wapalestina kuhama na kukimbilia nchi jirani za kiarabu wakiwa wakimbizi yaani Al-Naqba.

Israeli ilijitangazia uhuru wake Mei 14 mwaka 1948 kufuatia uhuru huo mataifa ya kiarabu Misri, Lebanon, Syria, Jordan na Iraq yaliivamia Israeli na kuzuka vita ya iliyojulikana kama 1948 Arab-Israel war. Israeli iliibuka kidedea ikiyateka maeneo zaidi ya ramani ya awali na kugawa mji wa Yerusalem.

Mwaka 1964 wapalestina walianzisha chama cha Palestinian Liberation Organization (PLO) ambacho hakikutambuliwa na Israeli.

Katika vita vya Siku Sita 1967 vya Israeli na waarabu ambavyo Israeli ilishinda kwa kishindo ikiacha hasara kubwa kwa maadui zake viliifanya nchi hiyo kujiongezea ukubwa mara tatu ya ule wa awali.

Siri ya ushindi wa vita hivyo ulitokana na mbinu na maandalizi mazuri yaliyokuwa yamefanywa na hasa ni kule kuvamia kabla ya adui hajakushambulia. Kama wangesubiri washambuliwe basi Israeli ingefutwa katika ramani ya dunia kama waarabu walivyokuwa wameazimia.

Vita hiyo ya 1967 Israeli ilipigana na Misri, Syria, Lebanon, Jordan zikisaidiwa kijeshi na Sudani, Iraq, Algeria nchi zilizopeleka askari na silaha, Urusi ikisaidia mataifa hayo kwa wingi wa silaha.

Kabla ya vita mataifa ya Marekani, Uingereza na Ufaransa yalipeleka silaha kwa Israeli na kuifanya isiwe na wasiwasi katika matumizi ya silaha.

Nini chanzo cha vita hiyo? Israeli na majirani zake walikuwa wakiishi katika hali ya uhasama tangu 1948 baada ya azimio la umoja wa mataifa la mwaka1947, lililoamuru kugawanywa kwa nchi hiyo, waarabu walikuwa bado wanayo hasira juu ya uwepo wa taifa hilo mashariki ya kati.

Viongozi mbalimbali wa nchi za kiarabu waliazimia kuifuta Israeli kwenye ramani ya dunia. Israeli iligombana na Syria ilipoanza mradi wa ujenzi wa miundombinu ya maji kuyatoa mto Jordan na kusambaza katika nchi hiyo. Jeshi la Syria likatumia milima/miinuko ya Golan ilinayopata futi 3000 juu ya Galilaya kushambulia vijiji na mashamba.

Mashumbulio ya Syria yaliongezeka sana mwaka 1965 -66, Israeli ikilalamika Umoja wa Mataifa ambao ulisisitiza kuacha mapigano bila kuchukua hatua yoyote kwa Syria ambapo hata ulipotoa azimio la kulaani mashambulizi hayo yalipingwa kwa kura ya veto na Urusi.

Mashambulizi hayo yalienda sanjali na vitendo vya kigaidi dhidi ya taifa hilo ambapo mwaka 1965 Rais wa Misri Gamal Abdel Nasser alisema “hatutaingia Palestina nchi ikiwa imefunikwa kwa mchanga bali damu”. Baada ya miezi michache Nasser alisema tena kuwa azma ya waarabu ni kuona wapalestina wanakombolewa, kwa kifupi ni kuiondoa dola ya kiyahudi kwa maangamizi.

Aprili 7, 1967 Syria ikitumia ndege aina ya MiG21 ilizokuwa imepewa na Urusi ilishambulia vijiji (kibbutzim) kutokea Miinuko ya Golan, Jeshi la Israeli lilitungua ndege sita za Syria.

Urusi iliipa taarifa isiyo sahihi Syria kuwa Israeli inajiandaa kwa vita licha ya Israel kukanusha lakini Syria ilijipanga ikiweka makubaliano ya ushirikiano na Misri.

Tarehe 15 Mei, 1967 siku ya uhuru wa Israeli, majeshi ya Misri yalivuka kuelekea Sinai karibu na mpaka na Israeli ambapo siku tatu baadaye tarehe 18 jeshi la Syria likajipanga kwa vita katika milima ya Golan.

Baada ya majeshi ya Misri na Syria kujipanga kwa vita, Gamal Abdel Nasser aliamuru jeshi la umoja wa mataifa UN Emergency Force (UNEF), lililokuwa Sinai likiikinga Israeli tangu 1956 kuondoka mara moja bila kushirikisha umoja huo.

Mei 22, Misri ilifunga mlango bahari wa Tiran na kuzuia meli zote za kutoka mashariki kuingia Israeli na kuzuia meli za Iran zilizokuwa zinapeleka mafuta ya petroli na kuifanya nchi hiyo kutokuwa na njia inayopitika (uamuzi wa Misri ulikiuka sheria za kimataifa).

Radio Sauti ya Waarabu ikisema “kwa kuwa sasa jeshi la kimataifa lililokuwa linaikinga Israeli limeondoka hatutavumilia zaidi wala kulalamika umoja wa mataifa ila jambo moja tutakalofanya ni kuipiga vita na kutokomeza siasa za kizayuni”.

Naye waziri wa ulinzi wa Syria Hafez Assad alisema “majeshi yetu yako tayari kuifuta Israeli” nakuu kwa kimombo ‘Our forces are now entirely ready not only to repulse the aggression, but to initiate the act of liberation itself, and to explode the Zionist presence in the Arab homeland. The Syrian army, with its finger on the trigger, is united....I, as a military man, believe that the time has come to enter into a battle of annihilation” alisema hayo Mei 20, 1967.

Rais wa Marekani Johnson alilaani na kusema kitendo cha Misri ni kinyume na sheria ya bahari iliyopitiwa mwaka 1958 ambapo umoja wa mataifa ulitambua haki ya Israeli kutumia mlango bahari wa Tiran (Straits of Tiran) kupitisha meli.

Nasser aliendelea na vitisho akiitaka Israeli kuingia vitani akidai kuwa hawatasikiliza shauri lolote la masikilizano kwani wao wako vitani na Israeli tangu mwaka 1948. Aliongeza kusema kuwa majeshi ya Misri, Jordan, Syria na Lebanon yametulia mipakani mwa Israeli na nyuma yao yapo majeshi ya Iraq, Algeria, Kuwait, Sudan, Saudi Arabia na ulimwengu wote wa kiarabu. Alijigamba zaidi kwa kusema kwa tendo hili dunia yote itastaajabia na kujua kuwa waarabu wapo wamejizatiti kwa vita.

Rais wa Iraq Abdur Rahman Aref alisema “Uwepo wa taifa la Israeli ni kosa ambalo ni lazima lirekebishwe, huu ni wakati wa kufuta aibu ambayo tumekuwa nayo tangu 1948, lengo letu ni kuifuta Israeli kwenye ramani”. Iraq ilipeleka majeshi yake Juni 4 kujiunga na Misri, Jordan na Syria.

Majeshi ya kiarabu yanayokadiliwa askari 465,000, zaidi ya vifaru 2,800, na ndege 800 viliizunguka Israeli.

Kipindi hicho Israeli ilikuwa kwenye hali ya tahadhari kwa wiki tatu muda huo iliutumia kuingiza silaha toka mataifa ya magharibi Marekani, Ufaransa na Uingereza. Silaha zilishushwa katika mji wenye bandari wa Haifa.

Israeli kwa kuwafahamu adui zake walivyo waliwafanyia kamchezo ka hadaa, kwanza ilifungua mpaka wake na Misri ili kuruhusu wapelelezi wa Misri kuingia na kutoka. Pili oparesheni ya kuhamisha silaha zilizowasili katika mji wa Haifa wakazipeleka ghuba ya Aqaba eneo lenye pori na miamba wakati wa mchana na kuzirudisha Haifa usiku na kuzihifadhi kwenye mahandaki.

Jambo jingine lililowasaidia Israeli ni hadaa iliyofanywa, Waarabu walipotangaza vita na kuitisha Israeli, iliwaita makamanda wote waliokuwa likizo kurudi kazini na mawaziri waliokuwa ziarani kurudi mara moja, jambo lililofanywa na Misri pia.

Baada ya wiki hizo tatu za maandalizi ya nguvu Israeli ikatangaza kuwa makamanda waliokuwa likizo waendelee na likizo zao inaonesha waarabu walikuwa wanawatisha tu hakutakuwa na vita.

Kipindi hicho Marekani ilijaribu kuzuia vita kwa kuishauri Misri kusitisha mpango wa vita lakini haikuwezekana kumshauri raisi wa Misri Gamal Abde Nasser hali iliyomfanya Rais wa Marekani Johnson kuonya kuwa “Israeli haitakuwa pekee vitani labda ikitaka kuwa hivyo”

Juni 5, 1967 waziri mkuu wa Israeli Levi Eshkol aliamuru kuishambulia Misri, hapo Israeli ilikuwa peke yake, lakini yenye makamanda waliojizatiti kwa mkakati maalum. Jeshi lote la anga la Israeli ukiacha ndege 12 tu ziliachwa kulinda anga la Israeli, majira ya saa 1.14 asubuhi (saa moja asubuhi) walipiga mabomu viwanja vyote vya ndege za kivita vya Misri wakati marubani wa ndege hizo wakipata kifungua kinywa.

Ndani ya masaa mawili ndege 300 za Misri zilikuwa zimeshapigwa mabomu na kuharibiwa kabisa, masaa machache baadaye ndege za Israeli zilishambulia majeshi ya anga ya Jordan na Syria na kiwanja kimoja cha Iraq.

Jioni ya siku ya kwanza ya vita ndege zote za Misri na Jordan na nusu ya ndege za Syria zilikuwa zimeharibiwa zikiwa viwanjani. (ujanja wa kuzipiga zikiwa kwenye hanger kabla hazijaruka ulitumika).

Misri iliyokuwa na nguvu za kijeshi na jeshi kubwa la ardhini lenye vifaru na magari ya vita ilianza matayarisho ya kuyavusha kwenye mfereji wa Suez (madarajani) likafauru kuvusha askari 20,000 hadi penisula ya Sinai.
Israel ikiwa inaangalia mwenendo wote wa majeshi ya Misri iliacha operesheni hiyo ifanyike ya uvushaji askari na silaha kuelekea Sinai na kisha ikatuma ndege zake kuvunja madaraja ya Suez na kuhakikisha hakuna msaada wa kijeshi wala chakula utakaovuka kusaidia kikosi kilichokwisha vuka.

Kisha vilianza vita vya ardhini ambapo mapigano makubwa ya kihistoria ya vifaru yalitokea baina ya majeshi ya Misri na Israeli katika jangwa la Sinai.

Baada ya Jordan kushambuliwa wapalestina wapatao 325,000 walioishi Ukingo wa Magharibi wa mto Jordan walilazimika kukimbia na kwenda nchini Jordan kuepuka vita.

Kikosi kidogo cha mashujaa wa Israeli kiliwekwa kuzuia majeshi ya Syria wakati vita vikali vikiendelea baina ya Israeli na Misri na Jordan hadi walipoona wamedhoofisha majeshi hayo ndipo kikosi kizima cha jeshi la anga kiliposhambulia ngome ya Syria kwenye milima Golan, Juni 9, baada ya siku mbili za mashumbulizi ya nguvu (heavy bombardment) walifaulu kupenya safu ya Syria.

Baada ya siku sita za mapigano Israeli ilikuwa na uwezo wa kuingia Cairo, Damascus na Amman bila kikwazo, wakati huo lengo la kuiteka Sinai na Miinuko ya Golan lilikuwa limefikiwa. Viongozi wa Israeli hawakuwa na nia ya kupiga miji mikuu ya nchi hizo, jambo ambalo walikuwa na uwezo nalo.

Zaidi ya hayo Urusi ikiwa imechanganyikiwa na mafanikio ya Israeli ikawa inatishia kuingilia vita. Wakati huo waziri wa Mambo ya nje (Secretary of State kama wanavyomwita) wa Marekani Dean Rusk aliishauri Israeli kukubali wito wa kusimamisha mapigano, Israeli ilikubali Juni 10 ilisimamisha mapigano.

Katika kushambulia milima ya Golan wanajeshi 115 wa Israeli walipoteza maisha ikipoteza ndege 46 kati ya 200 wakati upande wa waarabu Misri askari 15,000, Syria 2500 na Jordan 800.

Mwisho wa vita Israeli ilikuwa imejiongezea ukubwa wa eneo mara tatu kutoka maili za mraba 8000 hadi 26,000, ushindi huo uliifanya Israeli kuutwaa mji wa Yerusalem, mkono bahari wa Sinai, Golan Heights, Ukanda wa Gaza na Ukingo wa Magharibi wa mto Jordan.

Licha ya vita hiyo Israeli iliwashauri wapalestina kuendelea kuishi chini ya utawala wa Israeli ambapo baadhi ya familia za wapalestina zilizokuwa zimetengana waliweza kuungana na wengine hawakuwa na imani na Israeli.

Mwezi Novemba 1967, Baraza la Usalama la Umoja wa Mataifa lilipitisha Azimio na 242 lililowataka Israeli na Waarabu kuwa na amani ambapo Israeli ilitakiwa kuondoka katika Ardhi ilizoteka kwa makubaliano ya kuwa na amani na majirani zake.

Mwandishi maarufu wa habari za Waarabu katika Israeli Don Peretz aliyetembelea Ukingo wa Magharibi wa mto Jordan siku chache baada ya vita alithibitisha kuona jinsi Israeli ilivyojitahidi kurejesha hali ya kawaida ya maisha na kuzuia kuhama kwa waarabu maeneo hayo.


Mgogoro mwingine uliibuka mwaka 1973, vita vilivyojulikana kwa jina la Yom Kippur, waziri mkuu wa Israeli akiwa Golder Meir (Iron Woman) ambavyo Israeli ilipigana bila ya maandalizi yoyote kwani ilishambuliwa kwa kustukizwa.

Golder Meir ambaye alichaguliwa kuchukua nafasi ya Levi Eshkol kufuatia kifo chake cha ghafla Februari 26, 1969 na Meir kuanza kazi hiyo Machi 17 mwaka huo akiwa na sifa kem kem ikiwepo ya kufanikisha serikali ya mseto mwaka 1967 baada ya vita ya siku sita chama cha Mapai kilijiunga na vyama vingine vya Rafi na Ahdut HaAvoda na kuunda Israel Labour Party.

Ni katika kipindi cha Golder Meir kabla ya vita ya Yom Kippur yalitokea mauaji ya wanamichezo wa Israeli huko Ujerumani waliposhiriki michezo ya Olimpiki 1972 (1972 Summer Olympics) mauaji yaliyojulikana kama Mauaji ya Munich (Munich massacre) ambapo jumla ya wanamichezo 11 waliuawa na kikundi cha wapalestina kiliichoitwa Black September Organization.

Kwa ujasiri mkubwa baada ya kuona jumuia ya kimataifa haijachukua hatua stahili, Golder Meir aliamuru shirika lake la kijasusi Mossad kuwasaka na kuwaua wote walioshiriki kupanga mauaji hayo ambayo watekaji nyara walidai kuachiwa huru kwa wafungwa 363 wa kipalestina na wengine walioshikiliwa katika magereza ya Israeli. Operasheni hiyo ilijulikana kama Operesheni Ghadhabu ya Mungu au Operesheni Singe. ( Operation Wrath of God au Operation Bayonet)

Katika operesheni hiyo ambayo ililenga kulipiza kisasi kwa wote waliohusika kupanga mauaji hayo wakiwepo baadhi ya wanachama wa kundi la PLO na Black September Organization ambapo mauaji yalitekelezwa kwa siri na kundi la watu 15 waliogawanywa katika squad tano.

Vita ya Yom Kippur au Ramadhan war au vita vya Oktoba kama vinavyojulikana vilipiganwa toka Octoba 6 hadi 26 mwaka 1973 umoja wa mataifa ulipoilazimisha Israeli kusimamisha vita na hasa baada ya Israeli kukizingira kikosi kikubwa cha tatu cha Misri (Third Army).

Mwanzoni waarabu walionekana kushinda vita na kusababisha hasara kubwa kwa jeshi la Israeli lakini upepo uligeuka ambapo Israeli iliwapiga adui zake na kupenya hadi ukingo wa magharibi wa bahari ya Shamu (walivuka mfereji wa Suez)

Hata hivyo Idara ya Usalama ya Israeli ililaumiwa kwa kutokuwa makini kwani walionywa mara kadhaa kuhusu kusudio la waarabu la kuishambulia Israeli.

Vilianza kwa mashambulizi ya ghafla ya Misri na Syria siku ya sikukuu kubwa ya wayahudi ya kidini ambapo mataifa hayo mawili yaliishambulia Israeli kwa nguvu na kuonekana kama watashinda vita katika masaa 24 hadi 48 ya kwanza baada ya hapo hali iligeuka.

Katika wiki ya pili ya mapigano Syria ilikuwa imesukumwa kutoka milima ya Golan na kwa upande wa Misri vikosi vilisukumwa hadi kusini mwa Sinai na kisha kikosi cha Israeli kikapenya kati ya vikosi viwili vya Misri na kuvuka mfereji wa Suez na kukizingira kikosi cha tatu (Third Army) cha Misri.

Jeshi la Misri lililokuwa limevuka mfereji wa Suez (mpaka wa vita vya 1967, mstari wa kusimamisha mapigano) likajigawa Ukanda wa Gaza na kusini ukingo wa mashariki wa Suez likavunja ngome iliyojengwa iliyoigharimu Israeli USD 500 ambayo ilipewa jina la Bar Lev Line kwa heshima ya Jenerali Chaim Bar-Lev.

Kuzingilwa kwa kikosi huko kuliipa nguvu Israeli wakati wa mazungumzo yaliyokuwa kiini cha mkataba wa Camp David, Israeli ilitaka kukiangamiza kikosi hicho ambapo Misri ilibidi ijisalimishe ili kuokoa maisha ya wanajeshi wapatao 20,000.

Marekani ilitumia mwanya huo kuilazimisha Misri kufuta maombi ya msaada iliyokuwa imeomba toka Urusi na kuahidi kuisaidia na hivyo kupunguza ushawishi wa Urusi eneo hilo ambapo mambo yalihitimishwa kwa mkataba wa Camp David uliopatanisha Israeli na Misri hadi leo.

Baada ya kifo cha Gamar Abde Nasser rais wa Misri alitawala Anwaar Sadat ambaye alikuwa ametangaza mwaka 1972 kuwa ameamua kuingia vitani na Israeli na kwamba ameandaa wanajeshi milioni moja ambao wako tayari kujitoa muhanga ili kukomboa maeneo ya Sinai.

Kwa kauli hiyo mwishoni wa 1972 alinunua ndege za kivita MiG-21, makombora ya kutungulia ndege ya SA-2, SA-3, SA-6 na SA-7 , na vifaru aina ya T-55 na T-62, silaha za kulipulia vifaru RPG-7 na makombola ya vifaru ya AT-3 kutoka Urusi.

Sadat akiipa jina la Operesheni Badr (neno la kiarabu lenye maana ya mwezi mpevu) akilinganisha na Vita vya Badr ambavyo waislam waliwashinda Wakuraish wa Maka akikusudia kurudisha heshima ya Waarabu waliyopoteza katika vita ya 1967.

Habari za kijasusi ziliifikia Israeli kuwa Misri ilipanga kuivamia Israeli lakini isingefanya vile bila kupokea ndege za MiG-23 na makombola ya Scud ambayo yangetumika kuibomoa miji ya Israeli.

Taarifa hiyo iliifanya Israeli isiwe makini na kudhani vita isengetokea katika muda mfupi hivyo.

Mikakati ya vita iliyofanywa na Sadat na mwenzie Assad wa Syria ilikuwa kuivamia Israeli siku ya sikukuu kubwa ya Yom Kippur ambapo ilikuwa ni siku ya mapumziko, hakuna kuwasha mioto wala kuendesha magari na hivyo kufanya kila kitu kuwa kimya kabisa.

Hali hiyo iliwasaidia Israeli kwani walipovamiwa ghafla iliwawia rahisi kutumia barabara kujipanga haraka kwani hakukuwa na msongamano wa magari barabarani, pia iliwakusanya maaskari wa akiba kirahisi kwani wengi walikuwa kwenye masinagogi wakisali.

Mbinu nyingine iliyotumiwa na Misri ni kuwapa likizo maaskari wa akiba ambapo Nasser aliruhusu askari 20000 kwenda mapumzikoni na wengine kwenda Hija.

Usiku wa Septemba 25 mfalme Hussein wa Jordan aliruka kwa ndege kwa siri hadi Tel Aviv kumwonya waziri mkuu wa Israeli Golder Meir juu ya shambulio lililopangwa dhidi yake jambo ambalo walipuuza.

Mwezi huo Israeli ilipata maonyo kumi na moja toka vyanzo vya kuaminika lakini mkuu wa Mossad Zvi Zamir alipuuza. Lakini Golda Meir, Moshe Dayan, na Jenerali wa Israeli David Elazar walikutana saa 2:05 asubuhi ya siku ya Yom Kippur, masaa sita kabla ya shambulio.

Golder Meir alikataa kuanzisha shambulio akihofia kutopata msaada wowote toka nje. Wakati huo nchi za Ulaya zilikuwa zimeacha kuisaidia Israeli silaha. Mara waziri huyo alipotoa uamuzi alipokea ujumbe kutoka kwa katibu mkuu wa umoja wa mataifa Henry Kissinger kuwa Israeli isishambulie isubiri tu.

Vita hiyo ambayo kwa sehemu kubwa Israeli ililemewa na kupata hasara kubwa kwani katika masaa 27 ya kwanza ilikuwa imepoteza ndege 30 na vifaru 300 katika shambulio la Misri la Bar-Lev huku jeshi hilo la Misri likiwa limesonga mbele kwenye jangwa la Sinai kilomita tano.

Israeli ilibidi ibadili mbinu za kivita kwani makombora ya ulinzi wa anga ya SAM yaliwazidi nguvu, wakaamua kutumia jeshi la miguu (Infantry), kikosi hicho kilifaulu kwa sehemu kubwa hadi kupenya hadi kwenye safu yalikowekwa makombola hayo na kuyaharibu na hivyo kudhoofisha mfumo wa kujikinga wa Misri.

Baada ya kudhoofisha mfumo huo wa ulinzi ndipo jeshi la anga la Israeli likazidisha mashambulizi. Siku iliyofuata, Oktoba 15, Israeli ilianzisha Operesheni Abiray-Lev (yaani stout-hearted men au operesheni ya majasiri/mashujaa).

Divisheni iliyoongozwa na Meja Jenerali Ariel Sharon ilishambulia safu za jeshi la Misri eneo la Ismailiya kati ya kikosi cha pili kilichokuwa kaskazini na cha tatu kusini (Second and Third Army) na kufaulu kupenya hadi Suez na kuvuka.

Baada ya siku chache Israeli ilijenga madaraja manne kuvuka mfereji wa Suez mwisho wa vita Israeli ilikuwa ndani ya Misri kilomita 101 kutoka mji mkuu wa Misri Cairo.

Kwa upande wa Syria hali ilikuwa tofauti kidogo, pamoja na kuwa na silaha kama zile za Misri vita vilikuwa vikali ambapo ndege za Israeli zikikwepa kutunguliwa zilikuwa zikipita uwanda wa chini wa Jordan kisha kuibukia Syria na vifaru vingi vilipelekwa huko.

Viongozi wa Israeli waliithamini sana milima ya Golan na hivyo kupeleka nguvu zote hapo kwani jeshi la Syria lingefaulu kuteka milima hiyo ingelikuwa rahisi kupita hadi Tiberias, Safed, Haifa, Netanya, na Tel Aviv.

Askari wote wa akiba walipelekwa milima ya Golan wakipewa vifaru na kuendelea na mapambano, hapo ndipo alipoibuka shujaa wa vita hivyo Luten Zvika Greengold ambaye alifika jioni hiyo kwenye uwanja wa mapambano, alikuwa peke yake akitumia kifaru chake kupambana na majeshi ya Syria akiyapiga hadi msaada ulipofika.

Masaa 20 baadaye Zvika Force jina alilobatizwa alitumia kifaru chake kuingia katikati ya vifaru vya Syria na kuvipiga huko na huko ambapo alibadili vifaru sita, wakati mwingine akijichanganya na kikosi cha vifaru mara nyingine peke yake, alijeruhiwa, aliunguzwa moto lakini aliendelea na mapambano kwa kitendo hicho Zvika alitangazwa kuwa shujaa wa vita hivyo.

Baraza la Usalama la Umoja wa Mataifa lilipitisha Azimio namba 338 la kusitisha vita baada ya Marekani na Urusi kukubaliana Oktoba 22 ambalo lilianza kutekelezwa masaa 12 baadaye.

Baada ya kuanza utekelezaji wa azimio hilo Misri ilishambulia mara kadhaa vikosi vya Israeli ikiharibu vifaru 9, kwa kulipiza kisasi Israeli ilielekeza majeshi yake kusini na kukizingira kikosi cha tatu cha Misri baada ya Jenerali David Elazar kuomba idhini toka kwa Moshe Dayan kwani zoezi la kusimamisha mapigano lilianza kutekelezwa wakati Israeli imebakiza mita chache kufikia malengo wakateka barabara kuu ya Cairo kwenda Suez.

Asubuhi ya Oktoba 23, Urusi iliilaumu Israeli kwamba majeshi yake yalionekana yakielekea kusini Henry Kissinger akampigia simu Golder Meir kuwa unawezaje kutambua mstari wa kusimamisha mapigano jangwani ambapo Meir alimjibu kuwa wote watajua tu akiwa na maana watajijua na jeuri yao, muda mfupi baadaye Kissinger alipata taarifa za kuzingirwa kwa kikosi cha tatu (Third Army).

Kissinger aligundua kuwa hiyo ni nafasi ya pekee kwa Marekani kuibana Misri ili kuiondoa kwenye ushawishi wa Urusi, kwa kweli Misri haikua na ujanja wowote zaidi ya kuitegemea Marekani kuizuia Israeli isikiangamize kikosi kilichozingirwa ambacho hakikuwa na chakula wala maji.

Wakati huo Rais wa Urusi Leonard Brezhnev alimtumia barua Rais wa Marekani Richard Nixon akisema kuwa Urusi na Marekani kwa pamoja visimamie usitishaji huo wa mapigano vinginevyo Urusi ingeingilia kuisaidia Misri.

Urusi ilikuwa imeshaandaa vikosi na baadhi yake ikawa imevisafirisha toka Urusi hadi kwenye kituo chake cha kijeshi cha Yugoslavia na kupeleka kikosi cha wanamaji 40,000 kwenye bahari ya Mediterrenea.

Kwa bahati mbaya barua hiyo ilifika Nixon akiwa amelala hivyo Kissinger na maafisa wengine wa Ikulu akiwemo Katibu wa ulinzi James Schlesinger, Mkurugenzi wa CIA William Colby na Mkuu wa WhiteHouse Alexander Haig (Kashfa ya Watergate ikiwa kileleni) waliishughulikia.

Wakubwa hao bila kumshirikisha Rais Nixon wakajibu kwa jina la Nixon kwa Urusi na kuiambia Misri ijitoe katika ushawishi wa Urusi vinginevyo Urusi ikiingilia na wao wataingia vitani, hilo likawa tishio la vita ya tatu ambayo ingekuwa ya Nuclear.

Urusi ilishangaa na hofu iliyowakumba Marekani hata mkuu wa KGB Yuri Andropov akasema hali ni tete hatuwezi kuruhusu vita ya tatu.

Asubuhi yake Misri ilikubali ushauri wa Marekani na kutangaza kufuta ombi la msaada iliyokuwa imeomba awali na Urusi ikakiri kushindwa vita kwa waarabu na huo ukawa ndiyo mwisho wa mgogoro.


Kutekelezwa kwa wito wa kusimamisha mapigano baina ya Misri na Israeli kuliichanganya Syria iliyokuwa imejiandaa upya kuishambulia Israeli tarehe 23 Oktoba baada ya kutafakari ikajua kuwa nguvu yote ya Israeli ingehamia kwake na kupiga Damascus hivyo Assad akatangaza kusimamisha mapigano Oktoba 23, na Iraqi ikawarudisha nyumbani askari wake.


Hata hivyo baada ya vita hiyo Golder Meir alijiuzulu kufuatiwa lawama za kutojiandaa kwa taifa hilo kivita (utayari wa vita) baada ya tume ya Agranat Commission kuelekeza lawama zote kwake na Yitzhak Rabin akamrithi mnamo Juni 3, 1973.

Mwaka 1975, Meir alituzwa Tuzo ya Israeli ( Israel Prize ) kwa mchango wake maalum kwa taifa la Israel. Alifariki Disemba 8, 1978 kwa saratani mjini Jerusalem akiwa na umri wa miaka 80.


MWISHO KWA LEO.

JESHI LAENDELEA KUTHAMINI WANANCHI WAKE KIAFYA.

HOSPITALI ya Jeshi la wananchi wa Tanzania (JWTZ) iliyopo eneo la Mbalizi wilaya ya Mbeya Vijijini mkoani Mbeya limesema linathamini wagonjwa wa Ukimwi maana taifa linawahitaji kuendelea kulitumikia

Hayo yameelezwa mwishoni mwa wiki na Mganga Mkuu Luteni Kanali Denis Janga ambaye pia ni mkuu wa kikosi cha hospitali hiyo katika mahojiano maalum na Tanzania Daima wilayani humo lilipotembelea katika hospitali hiyo.
Janga alisema kwamba Hospitali hiyo inahudumia wagonjwa wa Ukimwi zaidi ya 2000 kwa mwaka na tangu kijengwe kituo maalum cha kutoa huduma na matibabu kwa wagonjwa wa Ukimwi 2006 wagonjwa wamekuwa wakijitokeza kila siku.

Mganga huyo alifafanua kuwa wagonjwa wengi wanaoathirika na Ukimwi wanakufa kwasababu wanasita kujitokeza mapema hospitalini na kinachowau wengi wao ni kifua kikuu (TB) ambayo inafikia mahala inakuwa sugu.

‘’Wagonjwa wa ukimwi wamekuwa wakikimbilia katika hospitali yetu kwasababu wanazoeleza kuwa ni kutokana na huduma tunazotoa ikiwa ni pamoja na kuwathamini kama wagonjwa wengine’’

‘’Hawa ni watanzania wenzetu na Taifa linaendelea kuwategemeas katika shughuli mbalimbli sawa na wananchi ambao hawajaathirika na Ukimwi hivyo nidhamu na maadili ya uuguzi ni muhimu kuzingatiwa katika kumhudumia mgonjwa yeyote’’ alisema Janga.

Hata hivyo alifafanua zaidi kwamba ugonjwa wa ukimwi siyo ajali bali ni ugonjwa kama magonjwa mengine yanayowapata wananchi wote na kwa kuzingatia hilo wananchi na wauguzi katika hospitali na zahanati zozote nchini hawapaswi kuwanyanyapaa wagonjwa wa ukimwi.

Alisema kuwa hospitali yake kwa kutambua hilo imefikia hatua ya kuwahudumia wagonjwa wa ukimwi kwa kuwapatia nauli ambao wanatoka maeneo ya mbali na wale ambao maisha yao ni duni.

Akifafanua zaidi juu ya hilo, Ofisa utawala wa Hospitali hiyo Capteni Said Nyumayo alisema kuwa fungu la kuwasaidia wagonjwa hao ambao hawajiwezi kimaisha linatokana na michango ya waganga na wauguzi wa hospitali hiyo ambayo inatolewa kwa hiari kwa ajili ya kuwasaidia wagonjwa.

‘’Sisi kama binadamu tunatambua umuhimu wa kusaidia wanyonge hivyo nauli ama utu tunaoutoa kwa wagonjwa si fungu kutoka serikalini bali ni utu tuliojaliwa na Mungu’’ alisema Capten Said.

Alipoulizwa utaratibu ama ubabaishaji unaolalamikiwa katika hospitali nyingi hasa kwa upande wa utoaji dawa za wagonjwa waliobainika kuwa na Ukimwi alisema kuwa katika hospitali hiyo ya jeshi hakuna hali ya kuwazungusha wagonjwa na ndiyo maana hospitali hiyo imekuwa kimbilio la wagonjwa kutoka sehemu mbalimbali.

Capteni huyo alifafanua kuwa wagonjwa wote wanaofika katika hospitali hiyo wakiwa na hali mbaya na wakipimwa wakionekana kuwa wanamaabukizi ya ugonjwa huo wanaanzishiwa dawa mara moja jambo ambalo hospitali hiyo imefanikiwa na kukidhi haja za wagonjwa wanaojitokeza kutibiwa hospitalini hapo.

Wataalam hao wa afya walipoulizwa njia wanazotumia kuhamasisha wananchi kujitokeza kupima virusu vya Ukimwi walisema kuwa ni pamoja na utaratibu wa (Open House) ambapo wanaandaa vikundi vya ngoma na matarumbeta na kwenda uraiani kuhamasisha utaratibu ambao walisema kuwa umesaidia sana katika upimaji na kuhamasisha wananchi kujitokeza kupima.

Akihitimisha mahojiano hayo, Luteni Kanali Denis Janga alisema kuwa licha ya hospitali hiyo kuwa ya Jeshi lakini asilimia 80 inatoa huduma kwa raia wa kawaida kutoka nje ya kambi la jeshi.

Mwisho.

Friday, March 5, 2010

MILIMA ILIYOKANDO KANDO MWA BARABARA KUU MKOANI IRINGA IKIWA IMEPAMBWA NA MAWE YA ASILI NA KUUPENDEZESHA MKOA HUO AULIOPO KANDA YA NYANDA ZA JUU KUSINI.

WATOTO DORICA NA DORINE DANIEL MBEGA, WAKIFURAHIA MAANDALIZI YA WAZAZI WAO WALIVYOWAANDAA KWENDA SHULENI HUKO JIJINI DAR ES SALAAM MAANA UJANJA SHULE.

ABSALOM KIBANDA AMBAYE NI MHARIRI WA GAZETI LA TANZANIA DAIMA AKIWA NA GRADNESS MUNUO AMBAYE NI MRATIBU WA GEMSAT WAKIWA MJINI MOROGORO KWENYE MAFUNZO YA JINSIA.

KINGWENDU AITEKA MBEYA

Msanii machachari katika anga za uigizaji na uimbaji wa nyimbo za Bongo freva hapa nchini, Rashid Mwinshehe maarufu kwa jina la Kingwendu, ameuteka mji mdogo wa Tunduma wilayani Mbozi mkoani Mbeya na kusababisha barabara kufurika watu badala ya magari kama ilivyozoeleka katika mji huo.


Hali hiyo ilitokea jana baada ya msanii huyo na kundi lake walipopita barabarani na gari la matangazo na kuwasalimia mashabiki wao ikiwa ni maandalizi ya kutumbuiza katika shule ya sekondari ya Mbozi Sekondari iliyopo wilayani hum oleo hii.

Wakiwa katika gari hiyo ya matangazo, Kingwendu na washirika wake waliimba wimbo maarufu kama mapepe na kuonesha umahiri wao wa kuigiza huku wakishangiliwa na wananchi wa mji huo na baadhi ya wananchi wakiangua vicheko bila kujizuia.

Akiongea na mmiliki wa tovuti hii mjini Tunduma leo, Kingwendu alisema kuwa licha ya shule ya sekondari ya Mbozi kumwalika kutumbuiza kesho katika ufunguzi wa kidato cha tano shuleni hapo aliona ni busara kuwasalima mashabiki wake iki ni moja ya njia ya kuwashukuru.

‘’Mimi kama Kingwendu meli ya sumu, nimeona ni vema kutumia nafasi hii kuwashukuru mashabiki wangu wanaonipa support kila kukicha kwa mkoa wa Mbeya na kuwakaribisha katika onesho la kesho ambalo litafanyika katika shule ya sekondari ya Mbozi’’ alisema Kingwendu.

Suala la kuchanganya kuimba na kuigiza alitanabaisha kuwa hali hiyo inatokana na wingi wa vipaji alivyopatiwa na Mungu hivyo hana budi kuviendeleza lakini aliweka wazi kuwa sanaa ya kuigiza hawezi kuiacha maana ndiyo sanaa iliyomuibua na kumtambulisha kwa wananchi.

Naye Mwenyekiti wa starehe na burudani wa shule hiyo George Silungwa ambaye pia ni ofisa mipango ya maendeleo ya shule hiyo ya Mbozi alisema kuwa shule yake iliamua kumwalika msanii huyo kutokanana maigizo yake kulenge kuelimisha jamii ya lika zote.

‘’Tumemwalika Kingwendu kwa nia moja ya kuelimisha jamii kwa njia ya maigizo hata nyimbo pia kwasababu ya mahusiano take na jamii na kesho(leo) wanafunzi, walimu, na kada mbalimbali wakiwemo wananchi watamshuhudia msanii huyo akitumbuiza katika shule yetu bila kiingilio chochote’’ alisema Silungwa.