Kauli hiyo imetolewa na Mkurugenzi wa Zana za Kilimo na Uongezaji Thamani kutoka Wizara ya Kilimo, Anna Mwangamilo, wakati wa ziara ya wajumbe wa kimataifa iliyohitimisha mkutano wa Afrika kuhusu Matumizi Endelevu ya Zana za Kilimo jijini Dar es Salaam.
Hatua hiyo ni ishara tosha kuwa taifa lina rasilimali na maarifa ya kipekee yanayowafanya wageni kutoka mataifa mbalimbali kuja kujifunza nchini.
Kutokana na hali hiyo, vijana nchini wamehimizwa kubadilika na kuacha tabia ya kulalamikia ukosefu wa ajira wakati fursa za wazi zipo katika sekta ya kilimo chenye tija.
Ukweli kwamba wageni wanakuja kujifunza nchini ina maana kuwa Tanzania ina kitu cha thamani, hivyo ni wakati wa vijana kufanya kazi kwa bidii na kutumia maarifa hayo kujiajiri.
Wajumbe hao wa kimataifa wametembelea Shamba la Chama cha Ushirika cha Wakulima cha Umwagiliaji (CHAURU) lililopo mkoani Pwani ambapo wameshuhudia matumizi ya mitambo ya kisasa katika upandaji, uandaaji wa mashamba na uongezaji thamani wa mazao, hususan zao la mpunga, mambo yanayopanua soko la ndani na nje ya nchi.
Meneja wa CHAURU, Shamiuna Shoo, amesisitiza umuhimu wa teknolojia za kisasa katika kukuza sekta ya kilimo na kuwahimiza wadau, wakiwemo vijana, kuwekeza zaidi kwenye zana na mitambo ili kuongeza kipato chao.
Badala ya kubaki nyuma, vijana wanapaswa kutambua kuwa Tanzania ipo "gado" na imara kiuchumi kupitia uwekezaji huu wa kiteknolojia. Matarajio ya mkutano na ziara hiyo ni kueneza ujuzi wa kilimo endelevu na uzalishaji wa mazao bora, jambo ambalo litaleta mapinduzi ya kweli ya ajira na chakula bora kwa taifa na ulimwengu kwa ujumla.
0 Comments