Maboresho makubwa yaliyofanywa na Serikali ya Awamu ya Sita chini ya Rais Samia Suluhu Hassan yameanza kuleta matunda ya wazi, ambapo Bandari ya Tanga sasa imekuwa kitovu cha fursa lukuki kwa wasafirishaji na madereva wa malori ya mizigo. Kupitia uwekezaji katika miundombinu, bandari hiyo imeshuhudia ongezeko kubwa la shehena, jambo linalofungua milango ya ajira na biashara kwa wazawa.
Ufanisi wa Bandari ya Tanga umeongezeka kwa kiwango kikubwa, ambapo sasa bandari hiyo inapokea wastani wa magari 600 hadi 800 kila mwezi. Magari hayo husafirisha mizigo kuelekea maeneo mbalimbali ya ndani na nje ya nchi, ikiwemo nchi jirani za Zambia na Jamhuri ya Kidemokrasia ya Kongo (DRC).
Meneja wa Bandari ya Tanga, Saleh Mbega, amewahimiza madereva kupitia ufunguzi wa Chama cha Madereva wa Magari ya Masafa Mkoa wa Tanga (CHAMATA), kufanya kazi kwa weledi na uadilifu. Lengo kuu ni kuhakikisha mizigo ya wateja inafika salama bila hitilafu yoyote kama vile wizi au uchomaji wa vifaa, ili kuilinda taswira ya bandari hiyo.
Maono ya Rais Samia yamelenga kukuza biashara na kuinua uchumi wa wananchi mmoja mmoja na taifa kwa ujumla.
Kupitia CHAMATA, yenye wanachama zaidi ya 400, vijana na wazawa wa mkoa wa Tanga sasa wanapata fursa ya moja kwa moja ya ajira kupitia sekta ya usafirishaji wa mizigo.
Mwenyekiti wa chama hicho taifa, Abdallah Said, amesisitiza kuwa bandari hiyo itakuwa mfano kwa kuhakikisha uaminifu unatawala ili kuvutia wateja zaidi, jambo ambalo ni matokeo ya moja kwa moja ya mazingira wezeshi ya kibiashara yaliyowekwa na serikali.
@@@@@@@@@@@@
RC RUVUMA ASHTUKIA ISHU YA USALAMA: AOMBA JUKWAA LA UELEWA KULINDA MIPAKA
Mkuu wa Mkoa wa Ruvuma, Ahmed Abbas, ametoa ombi rasmi kwa Waziri wa Katiba na Sheria, Juma Homera, la kuundwa kwa jukwaa la pamoja la uelewa ili kuimarisha ulinzi na usalama wa taifa.
Ombi hili linakuja kufuatia changamoto za kisheria na kiusalama zinazojitokeza mkoani humo, hususan katika kushughulikia watu wanaoingia nchini kinyume cha sheria.
Mkuu wa Mkoa amebainisha kuwa Ruvuma, ukiwa mkoa wa mipakani, unakabiliwa na wimbi kubwa la raia kutoka nchi jirani wanaoingia kwa njia halali na zisizo sahihi. Changamoto kuu iliyobainishwa ni pamoja na kukamatwa kwa wageni ambao baada ya kufikishwa mahakamani, hupewa hukumu za kifungo cha nje au faini ndogo, hali inayowezesha wao kubaki uraiani badala ya kurudishwa makwao.
Changamoto nyingine ni kuwepo kwa sintofahamu na kutofautiana kwa tafsiri ya kisheria kati ya vyombo vya usalama (vinavyokamata) na mhimili wa mahakama (unaotoa maamuzi).
Mkuu huyo wa mkoa amesema mazingira ya mtuhumiwa kukamatwa leo lakini baada ya siku mbili anaonekana mtaani kunazidi kuleta wasiwasi wa kiusalama kwa wananchi.
Alisema lengo la jukwaa lililoombwa ni kuwakutanisha wataalamu wa sheria, vyombo vya usalama, na wadau wengine ili kujenga uelewa wa pamoja juu ya namna ya kushughulikia mashauri haya bila kuathiri maendeleo ya nchi. Jukwaa hili amesema litasaidia kuondoa sintofahamu katika maamuzi yanayotolewa na mahakama na kuhakikisha usalama wa raia na mali zao unalindwa kwa weledi.
Aidha jukwaa hilo litaimarisha ushirikiano kati ya Ofisi ya Taifa ya Mashtaka, Mahakama, na vyombo vya ulinzi.
Katika hatua nyingine, serikali imeeleza kuendelea kutekeleza miradi ya ujenzi wa mahakama mkoani Ruvuma, ikiwemo Mahakama ya Mwanzo na Mahakama Jumuishi. Ujenzi wa Mahakama Kuu mjini Songea unatajwa kuwa utarahisisha upatikanaji wa haki kwa wananchi kuanzia ngazi za chini, jambo ambalo litaendana sambamba na uimarishaji wa ulinzi wa amani uliosisitizwa na uongozi wa mkoa.
0 Comments