Katika safari ya kuelekea maendeleo, hakuna jambo lenye thamani kama utu na amani ya moyo kwa raia wake, kuanzia mwanafunzi aliye shuleni hadi mjasiriamali aliyeko sokoni.
Wiki hii, simulizi ya mabadiliko imechochewa na ujasiri wa binti mdogo, Mariana Eric Mirindima, mwanafunzi wa kidato cha kwanza katika Shule ya Sekondari Jangwani. Kupitia kipande cha video kilichosambaa mitandaoni, Mariana aliibua sauti ya maelfu ya wanafunzi wanaoteseka kwa unyanyasaji wa baadhi ya madereva na makondakta wa daladala.
Sauti hiyo ya Mariana haikuangukia kwenye mwamba, Februari 4, 2026, Waziri wa Uchukuzi, Prof. Makame Mbarawa, ametoa agizo zito jijini Dodoma kwa Mamlaka ya Udhibiti Usafiri Ardhini (LATRA) akitaka hatua kali za kisheria dhidi ya madereva na makondakta watakaobainika kuwanyanyasa wanafunzi .
Aidha ametaka kufanyika kwa zoezi la kuthibitisha madereva na kusajili makondakta nchi nzima ili kuongeza uwajibikaji.
Huu ni ujumbe tosha kuwa katika Awamu ya Sita, usafiri wa mwanafunzi siyo hisani, bali ni haki inayopaswa kutolewa kwa heshima na utu.
Amani: Shamba la Maendeleo
Wakati Serikali ikishughulikia kero za usafiri, akina mama na wajasiriamali mkoani Simiyu wanatukumbusha kuwa yote haya yanawezekana tu ikiwa nchi ina amani. Spora Ngh’wani, mkazi wa Bariadi, anabainisha kuwa amani ikitoweka, wanawake na watoto ndiyo waathirika wa kwanza.
Kwa mjasiriamali kama Kulwa Mtebe, amani ni zaidi ya utulivu wa mitaani; ni hali inayoruhusu familia kustawi na biashara kunawiri. Rebeca Shilinde wa Busega anaongeza kuwa bila amani ya moyoni, mwanadamu hawezi kufanya kazi yoyote. Hii ndiyo siri ya Tanzania—tumechagua amani ili tuweze kuwalinda watoto wetu kama Mariana na kuruhusu kila mjasiriamali kufanya kazi yake kwa uhuru.
Ujumbe wa Leo: Acha Malumbano, Linda Amani na Utu
Tunapoelekea kwenye kilele cha maendeleo, ni wajibu wa kila Mtanzania kuelewa kuwa amani yetu ndiyo mtaji wetu mkuu. Unyanyasaji wa wanafunzi barabarani ni adui wa amani hiyo. Kwa pamoja, kwa kusimamia agizo la Prof. Mbarawa na kulinda utulivu uliopo, tunahakikisha kuwa nchi iliyobarikiwa inaendelea kusonga mbele kwa kauli mbiu yetu: Kazi na Utu Tunasonge Mbele.
0 Comments