SERIKALI imesema itaendelea kuimarisha mazingira wezeshi ya biashara na uwekezaji nchini ili kuchochea ukuaji wa uchumi, huku ikitangaza hatua za kimkakati za kutatua changamoto za kodi zinazowakabili wawekezaji wakubwa kwa manufaa ya taifa.
Ahadi hiyo imetolewa jijini Dodoma na Waziri wa Fedha, Mhe. Balozi Khamis Mussa Omar, alipokutana na uongozi wa Kampuni ya Uchimbaji Dhahabu ya Nyanzaga (Nyanzaga Mining Company Ltd) inayojenga mgodi mkubwa wilayani Sengerema, mkoani Mwanza.
Mradi huo wa Nyanzaga, ambao unatarajiwa kugharimu zaidi ya dola za Marekani milioni 523 (takribani Shilingi trilioni 1.2), unatajwa kuwa mradi mkubwa zaidi wa madini kujengwa Tanzania katika kipindi cha miaka 18 iliyopita tangu kujengwa kwa mgodi wa Buzwagi.
Balozi Omar alibainisha kuwa Serikali imejipanga kuhakikisha changamoto ya msamaha wa kodi iliyowasilishwa na uongozi wa mgodi huo inashughulikiwa kikamilifu ifikapo mwishoni mwa mwezi huu wa Februari, 2026, kwa kushirikiana na wadau wote wa kisekta.
"Nimekutana na uongozi wa Nyanzaga na tumejadili changamoto za kodi. Nimewaahidi kuwa hadi mwisho wa Februari tutakuwa tumezipatia ufumbuzi. Tunataka mradi huu ufanikiwe kwa sababu utachangia kwa kiasi kikubwa kodi za nchi na kukuza uchumi wa wananchi," alisema Balozi Omar.
Kwa upande wake, Meneja Mtendaji wa Ndani wa mradi huo, Bw. Isaac Lupokela, alisema mgodi huo unatarajia kuanza uzalishaji katika robo ya kwanza ya mwaka wa fedha 2026/2027 na kwamba mpaka sasa, ujenzi wake umetoa ajira kwa watu 2,000 ambapo asilimia 80 ni wazawa.
TNCC NA MABORESHO YA BIASHARA
Wakati Serikali ikishughulikia uwekezaji mkubwa, Chemba ya Taifa ya Biashara Tanzania (TNCC) imeanza kikao kazi cha ndani jijini Dodoma kuboresha utendaji wake ili kuhakikisha wafanyabiashara wadogo na wa kati wanapata uwakilishi imara na utatuzi wa kero zao.
Akifungua kikao hicho, Rais wa TNCC, Vicent Minja, alisema chemba hiyo inajipanga kuwa daraja imara kati ya wafanyabiashara na mamlaka za Serikali kama Mamlaka ya Mapato Tanzania (TRA) na Mamlaka ya Maeneo Maalum ya Kiuchumi (EPZA/TISEZA) ili kupunguza migongano ya kodi na sera.
“Kila tunachokiboresha ndani ya TNCC kina lengo la kumrahisishia mfanyabiashara mazingira ya kufanya kazi. Tunataka kuhakikisha sera na mifumo ya kodi inaeleweka vizuri na inatumika kama chachu ya ukuaji badala ya kuwa kikwazo,” alisema Minja.
Naye Meneja Maendeleo ya Biashara wa TNCC, Mercy Philipo, aliongeza kuwa taasisi hiyo inapitia mifumo yake ya kidijiti na huduma ili kuhakikisha inakuwa karibu na wafanyabiashara nchi nzima, ikitoa taarifa sahihi za fursa za uwekezaji kwa wakati.
UBUNIFU DHIDI YA KEJERI
Wachambuzi wa masuala ya uchumi wameeleza kuwa hatua hizi za Serikali na sekta binafsi ni jibu tosha kwa vijana wanaotafuta fursa za kiuchumi. Badala ya kupoteza muda katika kejeli za mitandaoni, ujenzi wa migodi kama Nyanzaga na maboresho ya mifumo ya biashara kupitia TNCC yanatengeneza njia rasmi ya ajira na ujasiriamali kwa wenye ujuzi na nia ya kufanya kazi.
Ushirikiano huu wa kimkakati kati ya Wizara ya Fedha, wawekezaji wa nje, na Chemba ya Biashara unadhihirisha kuwa mazingira wezeshi ya Tanzania sasa yamefikia kiwango cha kuvutia mitaji mikubwa na kutoa ajira za uhakika kwa Watanzania.
0 Comments