WAKATI Watanzania wakisherehekea msimu wa sikukuu za Krismasi na Mwaka Mpya, wito mkali umetolewa kwa jamii, hususan vijana, kuhakikisha wanalinda amani na rasilimali za nchi kama msingi mkuu wa maendeleo ya kweli. Wakizungumza kwa nyakati tofauti, wananchi kutoka maeneo mbalimbali nchini wamesisitiza kuwa bila amani, ndoto za maelfu ya watu hupotea na uchumi huyumba.
Mkazi wa Dar es Salaam, Grant King’osi, amesema ni jukumu la kila mmoja kuhakikisha amani inalindwa, akisisitiza kuwa vijana wanapaswa kuwa mstari wa mbele kuepuka mambo yoyote yanayoweza kuvuruga utulivu wa nchi. Kauli hiyo iliungwa mkono na Sia Mtui, ambaye amewataka Watanzania kutumia kipindi hiki cha sikukuu kuimarisha mshikamano, upendo, na uvumilivu.
"Amani ndiyo msingi wa maendeleo. Katika kipindi hiki cha sikukuu, tuzitumie siku hizi kuimarisha ustawi wa jamii yetu na kuendeleza mshikamano," alisema Sia.
Kwa upande wake, Juliana Jimmy, mkazi wa Songwe, alitoa ushuhuda wa kusikitisha akirejea vurugu za Oktoba 29, 2025, ambazo ziligeuza siku ya kawaida kuwa ya hofu na majeraha.
"Vurugu hazitatui tatizo, bali huongeza maumivu na kuvunja mshikamano. Nilijionea namna vurugu zinavyoweza kubadilisha maisha kuwa hofu; zinacha majeraha ya mwili, kihisia, na kiuchumi," alisema Juliana akihimiza amani kutochezewa.
Fursa za Kiuchumi kama Kinga ya Amani
Katika kuunga mkono hitaji la amani kupitia maendeleo, Serikali imeeleza kuwa inaendelea kuimarisha sekta ya ajira kwa vijana ili kuwapa shughuli za kujiingizia kipato zitakazowafanya wawe walinzi wa utulivu badala ya kuwa vishawishi vya vurugu.
Mkoani Kigoma, Katibu Tawala wa Wilaya, Mganwa Nzota, amekabidhi pikipiki sita zenye thamani ya Sh. milioni 21 kwa vikundi vya vijana na wanawake. Mikopo hiyo, inayotolewa kupitia mapato ya ndani ya Halmashauri ya Manispaa ya Kigoma Ujiji kwa kushirikiana na Benki ya CRDB (Mpango wa Imbeju), inalenga kutengeneza chachu ya ajira na biashara.
"Serikali imeweka mkazo kwa halmashauri kuhakikisha zinatenga fedha na kutoa mikopo kwa vijana. Pikipiki hizi ziwe chachu ya kuanzisha shughuli za kiuchumi na kuajiri vijana wengine," alisema Nzota.
Hata hivyo, Kaimu Meneja wa Benki ya CRDB Kanda ya Magharibi, Anselm Mwenda, alionya dhidi ya udanganyifu ambapo baadhi ya watu hujaza majina ya watu wengi ili kuonekana ni kikundi kwa lengo la kujinufaisha binafsi. Alisisitiza kuwa benki itaendelea kufanya ziara za ukaguzi ili kuhakikisha mikopo hiyo inawafikia walengwa sahihi.
Hadi sasa, jumla ya Sh. milioni 619 zimetolewa kama mikopo kwa vikundi 66 mkoani humo, huku Ofisa Maendeleo ya Jamii, Jabiri Majira, akibainisha kuwa vikundi vya vijana, wanawake, na watu wenye ulemavu vimeendelea kuwa wanufaika wakuu wa fursa hizo zinazolenga kukuza kipato na kudumisha amani ya nchi.
0 Comments