Wimbi la mabadiliko ya teknolojia na changamoto za kijamii limeibua mwito mpya kwa wazazi na vijana nchini kuhakikisha wanatumia majukwaa ya kidijitali na uhuru wa kidemokrasia kwa ajili ya maendeleo badala ya kuchochea vurugu zinazoweza kuhatarisha amani ya nchi.
Mbunge wa Viti Maalumu Mkoa wa Morogoro, Mhe. Sheilla Lukuba, ametoa onyo kali kwa wazazi kutowaachia watoto wao uhuru uliopitiliza kwenye mitandao bila mwongozo. Amesema kuwa pengo la malezi katika ulimwengu wa kidijitali tayari limeanza kuonesha madhara, na ni lazima wazazi warudi kwenye misingi ya utamaduni na maadili yaliyoachwa na wahenga ili kulinusuru taifa lisipotee.
Kauli hiyo imeungwa mkono na Mwenyekiti wa Shirika la Kukuza Mila na Desturi Morogoro (SHIWAMILA), Ramadhan Divunyagale, aliyesisitiza kuwa amani na umoja ni tunu za taifa zinazopaswa kulindwa kwa gharama yoyote. Amewataka Watanzania, hususan vijana, kudumisha mila na desturi zinazohimiza utulivu huku wakiiombea serikali ya Awamu ya Sita chini ya Rais Samia Suluhu Hassan iendelee kuliongoza taifa vyema.
Kwa upande wake, aliyekuwa Meya wa Jiji la Dar es Salaam na Diwani wa Vingunguti, Mhe. Omary Kumbilamoto, amegusia matukio ya hivi karibuni yaliyosababisha vurugu mitaani. Kumbilamoto amebainisha kuwa vurugu si njia sahihi ya kufikisha hoja, na kwamba kama wananchi wangefuata taratibu za maandamano ya amani, ujumbe wao ungefika kwa usahihi kwa walengwa bila kuharibu mali au kuhatarisha maisha.
Kumbilamoto ameeleza kuwa uongozi wa kata yake umeanza kuchukua hatua za makusudi kwa kuanzisha matukio ya kijamii yanayowaleta vijana karibu ili kusikiliza kero zao. Aidha, amebainisha mpango wa kuanzisha vyanzo vipya vya mapato na fursa za kiuchumi ili kuwashughulisha vijana, jambo litakalopunguza ushawishi wa kujiingiza kwenye vitendo visivyofaa kutokana na ukosefu wa kazi.
Hata hivyo, jamii inasisistiza kuwa vijana wanapaswa kuitumia mitandao ya kijamii kama daraja la kujikwamua kiuchumi na si kama silaha ya uchochezi. Kwa upande mwingine, uongozi shirikishi na wa kiungwana ndio unaotajwa kuwa dawa ya kudumu ya kuhakikisha amani ya Tanzania inabaki kuwa mfano wa kuigwa barani Afrika.
0 Comments